18 June 2010
07:24 -
Дунё матбуотига кўра, Қирғизистонда ўзбеклар ҳужумга учради
Дунё матбуоти Ўш ва Жалолободда бўлган ўзбек-қирғиз қонли жанжалига катта эътибор бермоқда. Уларнинг мутлақо ҳаммаси, бу ўлкада камчиликни ташкил қилувчи ўзбеклар уй-жойини ташлаб Ўзбекистонга қочганини ёзмоқда, ўзбек қочқинларининг юракларни эзадиган расмларини эълон қилмоқда. АҚШнинг машҳур Washington Post ва Wall Street Journal газеталаридан тортиб Туркиянинг “Туркия” газетасигача қарасангиз, айнан шу манзарани кўрасиз.Масалан, “Туркия” газетасининг кечаги сонида берилган шу расм ҳам ўзбек қочоқларини кўрсатмоқда (расмни каттайтириш учун уни курсор билан босинг) .
Қирғизистоннинг Вақтли ҳукуматидаги ўзини демократман деб айтаётганлар ҳам, Қирғизистоннинг нисбатан демократик матбуоти ҳам, нимагадир, бу ҳақиқатдан норози. Уларга кўра, дунё воқеаларни бир томонлама ёритаётганмиш.
Масалан, ҳукуматдан мустақил бўлган АКИпресс агентлигининг сайтида Чолпон Ногойбаева исмли эксперт билан интервью ўтказилган. У ўзбек сўзини ҳам тилга олмадан “озчиликни ташил этувчи миллатни жафокаш қилиб кўрсатиш штампи ишламоқла” дейди.
Мустақил нашрларда ҳам бундай кайфиятнинг борлиги ваҳималидир, дейди мухбиримиз. Тўғри, бу уруш каби жанжалда икки томон ҳам қурбонлар берди. Аммо, ўзбеклар ҳужумга учраб қурбон берди, қирғизлар эса ўзини ҳимоя қилаётган ўзбеклар тарафидан қурбон қилинди. Бунинг фарқи бор.
Ўзбек ва қирғизлар турк аслли халқлар, бу ҳолга келишимиз, илдизи бир бўлган, дини ва тили бир бўлган икки халқнинг ўзаро қон тўкиши, чидаб бўлмайдиган нарса. Аммо, мавжуд шароитда қирғиз демократлари айб кўпроқ қирғизларда эканини тан олишлари ва ўзбеклардан кечирим сўрашлари керак. Акс ҳолда, вазиятнинг тузалиши яна ҳам қийинлашади.
