14 June 2010
20:53 - Қирғизистон жанубида ўлганлар сони 118 га чиқди, воқеаларнинг айбдори “Бирлик” Партияси ва “Ҳаракат” агентлигидир
Бугун Қирғизистон ҳукуматининг расмийлари Ўш ва Жалолобод вилоятларида ҳалок бўлганларнинг сони пешингача 118 га чиққанини билдирдилар. Талафот аввалги кунларга нисбатан оз бўлса-да, вазият ҳали ҳам қалтис. Ҳали ҳам уйлар ёқиб юборилмоқда, дўконлар таланмоқда, автомобилларда юрган номаълум шахслар одамларни урушга чақирмоқда.

Иккала шаҳар ва уларнинг атрфидаги туманларда кўп кишилик, автоматлар билан қуролланган ҳарбий патруллар юрибди. Лекин улар вазиятни тўла назорат остига олдилар, деб айтиш мумкин эмас. Ўшдан Ўзбекистон томонга қараб қочаётганлар ҳали ҳам кўп. Кутилмаганда воқеалар қайтадан оловланиб кетиши мумкин.

Жалолобод вилояти коменданти Кубатбек Байболов тартибсизликларнинг ташкилотчиларидан бири деб ҳисобланган таниқли сиёсатчининг қўлга олинганини айтди. Лекин унинг исмини очиқламади, кейинчалик албатта очиқланишини билдирди. Ўша одам ҳамма нарсани тан олиб, кўрсатмалар бераётган эмиш. У ўз сафдошларнинг исмларини берибди, улар ҳам таниқли ва кузда бўладиган парламент сайловларида иштирок этишларини эълон қилиб бўлган одамлар эмиш. Бу гаплар ҳақиқат бўлса, икки миллат ўртасида нифоқ чиқарганлар тезда маълум бўлиб қолади.

Аммо, дейди “Ҳаракат” мухбири, бу ерда қонли воқеаларни бошлаган махсус провокаторларни қидириш хато. Воқеаларнинг асл сабаби, Бишкекдаги давлат тўнтаришидир. Ўша кунларда “Бирлик” Партияси баёнот эълон қилиб, бу тўнтариш натижасида фуқаролар уруши бўлишини тахмин қилган эди. Сиёсий муҳитнинг, сиёсий воқеаларнинг қонуниятларини тушунмайдиган одамларгина, сабабни ташқаридан қидирадилар. Биров Россиядан, биров АҚШдан.

Дарвоқе, “Ҳаракат” сайти мухбирлари - ўзбек диаспорасини ёппасига Вақтли ҳукуматни қўллаб-қувватлаётгандек қилиб кўрсатишга уринаётганлар катта хато қилмоқдилар, бу хато фожеаларга олиб келади, деб тахмин қилгандилар. Айнан шундай бўлди.

Шу сабабли, кимдир қонли воқеаларда қандайдир қора кучларнинг қўлини қидираётган бўлса, бу қўл - “Бирлик” Партиясининг баёнотидаги етук сиёсатчиларнинг тахминлари ва “Ҳаракат” мухбирларининг тўғри бўлиб чиққан башоратларидир.

Масалага жиддийроқ қаралса, воқеаларнинг асл сабабчилари – “Бирлик”нинг баёнотига эътибор бермаган Вақтли ҳукумат раҳбарлари ва “Ҳаракат” муҳбирларининг огоҳлантиришларига қулоқ солмаган ўзбек диаспорасининг лидерларидир. Бишкекдаги давлат тўнтаришининг орқасида Россия тургани учунгина, бу мамлакатни ҳам Қирғизистон жанубидаги қонли воқеаларга билвосита алоқадорликда айблаш мумкин.
« Олдинги хабар
Хабарлар рўйхати
Кейинги хабар »

Ким кимдир? Who is Who?Добавить персону