14 April 2023
05:45 -
Юсуф Жума: ЎЧНИ ЎЗИНГДАН БОШЛАГИН – НОДОНЛИГИНГДАН ҚАСОС ОЛ!…
Ўчни ўзингдан бошлагин,Нодонлигингдан қасос ол!
Юмиқ кўзларинг - кўр юмрон,
Юмронлигингдан қасос ол!
Кимда бўлса бирон ўгит -
Удир - Тангри кўшки - Бошкент.
Оёғига бош уриб ўт,
Ҳайвонлигингдан қасос ол!
Қўли очиқ - кўнгли очиқ -
Яхшиларнинг йўли очиқ,
Қаттиқнинг қисмати аччиқ,
Тубанлигингдан қасос ол!
Сотқинлар қолмасин омон,
Юрт ёвига солгин қирон.
Энг бурун эмасдир осон -
Ёмонлигингдан қасос ол!
Қўрқоқлигингни синдиргин,
Элу юртга эрк эндиргин,
Бўйинсунма, бўйсундиргин,
Бесонлигиндан қасос ол!
Ҳар одиминг бўлсин қасос -
Тангрининг йўлида парвоз,
Юсуф, нодон Юсуф - носоз -
Нодонлигингдан қасос ол.
2023 йил, 13 апрель.
* * * * *
Ўрин талашмадим ҳеч ерда, ҳеч чоғ,
Ўрин талашмасдан топганман ўрин.
Менман очунда энг биринчи аҳмоқ,
Энг биринчи осий, ким дер ноўрин?!
Ўзи баланд бўлса қанчалик - қанча,
Пастлардан пастдирман шунчалик - шунча.
Борлиқ - Улуғ Тангри тўрлаган давра,
Тўр талашар мендан ташқари барча…
Ўрнини билганлар Ўзига яқин,
Айирмасин эсдан - бор дардга эмдан.
Билишинг шарт: қайда турибсан, тағин
Кимларнинг ичида ва ўзинг кимсан?!
2023 йил, 13 апрель.
