Ҳар ишинг десин - Оллоҳ!
- Оллоҳ демай - Оллоҳ! -де!
Турмушинг десин - Оллоҳ!
Оллоҳ демай - Оллоҳ! - де!
Бир умр тилда такрор
Оллоҳ дегунча, бир бор
Ҳақни айт - ҳақ сенга ёр,
Оллоҳ демай - Оллоҳ! - де!
Зулмга қарши ҳар сўз -
Тангри йўлидаги из -
Оллоҳ демакдир - азиз !
Оллоҳ демай - Оллоҳ! - де!
Золимга қарши туриш -
Ёғийга ҳужум - юриш -
Оллоҳ демак - пок юриш,
Оллоҳ демай - Оллоҳ! - де!
Оллоҳ деса беюрак,
Ўзи учун не керак,
Ёвга ташлан, довюрак,
Оллоҳ демай - Оллоҳ! - де!
Мазлумга чўзилган қўл -
Тангрига элтувчи йўл -
Бир умр шу йўлда бўл -
Оллоҳ демай - Оллоҳ! - де!
Кўнглимга солди Ўзи,
Чинакам Оллоҳ сўзи -
Оқ кўнглинг, қизил юзинг -
Оллоҳ демай - Оллоҳ! - де!
2021 йил, 22 август.
* * * * *
Икки очун тулпори - яхши отдир, яхши от.
Яхшилик - кураш - бори - яхши отдир, яхши от.
Ҳақ йўлига жон тикиб - яхши от - нек ном чиқар,
Ўзи яхшининг ёри - яхши отдир, яхши от.
Яхши от олиб борар - Тангрининг олқишига !
Тангрининг ихтиёри - яхши отдир, яхши от.
Ёмон от олиб борар - Тангрининг қарғишига,
Қутқарувчи сардори - яхши отдир, яхши от.
Бўлмагин юзи қора - номус - ор ёлғиз чора,
Оқ юзи - номус - ори - яхши отдир, яхши от.
Яхши от билан отлан! Эр - эрдир яхши отдан,
Тўққиз кўкдан юқори - яхши отдир, яхши от,
Юсуф, БируБорга бор, энг яхши от - БируБор,
Бирдан Бир БируБори - яхши отдир, яхши от!!!
2021 йил, 28 июль.
* * * * *
БОБУР МИРЗО ҲАЗРАТЛАРИ ЙЎЛЛАРИДА
Очунда мен этмаган бирон хато қолдими?!
Тош бошимга етмаган бирон хато қолдими?!
Дунёнинг бор тошини отдим - ўзимга ўзим -
Ўзимга тош отмаган бирон хато қолдими?!
Умрим - оғир бошоғриқ - бош - оёқ ечдим - хато,
Юрагимни йиртмаган бирон хато қолдими?!
Етмаган мендан бошқа тириклайин тамуғга –
Пушмон бўлиб ютмаган бирон хато қолдими?!
Очунда бор хато ҳам мен этган хатодан кам,
Ғўр Юсуф яратмаган бирон хато қолдими?!
2021 йил.
