07 July 2009
11:33 -
Урумчида уйғурлар исёнининг охири кўринмайдигандек
Бугун ҳам Уйғуристоннинг пойтахти Урумчи кўчаларига яна юзлаб уйғурлар чиқишди. Улар сўнгги икки кунда 180 га яқин уйғурнинг ўлдирилиши ва 1400 дан ортиқроғининг полиция томонидан ҳибсга олинишига норозилик билдирганлар. Бу ҳақдаги Reuters агенттлигининг хабарида қариндош ва яқинлари ўлдирилган ёки ҳибсга олинган маҳаллий уйғурларниннг ўша кунги воқеаларга оид маълумотлари ҳамда халқаро ҳуқуқ ҳимоячиси ташкилотлари вакилларининг Урумчидаги воқеаларни ўрганиш учун мустақил комиссия тузиш талаблари келтирилган. Гувоҳларнинг айтишича, бугун ҳам полиция билан тўқнашувлар давом этмоқда.
Хитой расмийлари Урумчидаги тартибсизликлар Жаҳон Уйғурлар Конгресси тарафидан оловлантирилди, деган иддаоларни ҳам олға сурмоқдалар. Бу ташкилотнинг АҚШда яшайдиган раиси Робия Қодир бу иддаоларни рад этди.
Кеча Истанбул шаҳрининг марказий Тақсим майдони томонга юриш қилган минглаб уйғурлар ва уларни қўллаб-қувватлаган турклар Хитойнинг мустамлакачилик сиёсатини қоралаб ва уйғурларга озодлик беришни талаб этиб, катта митинг ўтказдилар, деб хабар беради "Ҳаракат"нинг мухбири. Туркиянинг ҳамма телеканаллари бу митинг ва Уйғуристондаги воқеалар ҳақида кенг кўламли репортажлар беришди.
