12 June 2009
12:27 - Хабарчилик ҳам лўттибозликка айланмоқдами?
Хабарчилик билан шуғулланувчиларнинг иши аҳолини дунёда ва ўз мамлакатида бўлаётган воқеалар билан таништириш. Ўзбекистонда замонавий хабарчилик системаси яратилмагани сабабли, ўзбеклар хабарларни бошқалардан олишга мажбурлар. Аммо, бу “бошқалар”нинг маъсулият даражаси қандай эканлиги – хабарларнинг қанчалик тўғри эканлигини белгилайди.

Ҳозир бир мисол баҳонасида Ўзбекистонга оид хабарчиликда нималар бўлаётганини кўрайлик. “Озодлик” радиоси ҳеч қандай исботловчи фактлар келтирмасдан Ўзбекистон-Қирғизистон чегараларида 3 метр кенгликда чуқурлар ва 7 метр баландликда бетон деворлар қурилиши бошланганини билдирди.

“Озолдик”га асосланиб хабар тарқатган CAnews қирғизлар тарафидан айтилган турли тахминлар билан хабарини “бойитди”. Русларнинг Lenta.ru агентлиги эса, хабарини тамомийла CAnews асосланиб берган ва хабар ишончли чиқиши учун кўриб турганингиз расмни қўшган. Яхшилаб қарасангиз, расмда янги эмас, ўт босиб кетган эски бир нарсанинг қолдиқларини кўрасиз. У ерда юрганлар ҳам қурувчилар эмас, қуролланган аскарлар. Бунинг 7 метрлик деворга ҳеч алоқаси йўқ. Дарвоқе, “Озодлик“ радиосининг сайтида ҳам қандайдир чуқурнинг расми берилган. У Тошкентдаги биронта қурилишнинг фунтаменти учун ковланган чуқур бўлса ҳам ажаб эмас.

Биз Ўзбекистон бундай чуқурлар қазимаяпти ёки деворлар қурмаяпти демоқчимасмиз. Балки, қазиётгандир, қураётгандир. Аммо, ҳеч ким яшамайдиган чўлу саҳродан эмас, Фарғона водисидек жойдан асосли бўлмаган хабарлар тарқатиш лўттибозлик эканини урғуламоқчимиз.

“Ҳаракат“ агентлигининг мақсади ҳақиқатни ўрганиш ва ўзбеклларга сифатли хабар етказиш. Тўғри, ҳозир бунга қурбимиз етмаяпти. Лекин, бундан - “Озодлик“ радиоси, CAnews ва Lenta.ru каби агентликлар бизни алдаб юришга ҳақлари бор деган фикр чиқмайди.

Чиқиши керак бўлган фикр шундай: “Ҳаракат”ни замонавий хабар агентлигига айлантириш мутлақо заруриятдир. Хушига келган ҳар бир агентлик Ўзбекистон хусусида ёлғон-яшиқ хабар тарқатишига чек қўйиш учун “Ҳаракат”ни йўлга қўйишимиз шарт.

Буни тушунган ўзбекларни “Юзга юз минг!” кампаниясига қўшилишга яна бир марта чақирамиз. Сизнинг ёрдамингиз билангина бундай агентлик яратиш ва ўзбекларни информацион блокададан қутқариш мумкин.
« Олдинги хабар
Хабарлар рўйхати
Кейинги хабар »

Ким кимдир? Who is Who?Добавить персону