30 September 2012
13:43 -
АҚШ ва Ўзбекистон ахборот воситаларида яқдиллик: Fox News кечирим сўради, Olam.uz Ислом Каримнинг расмини олиб ташлади
Техник имкониятлар шунчалик ривожландики, замонавий ТВлар баъзи воқеаларни тўғридан-тўғри воқеа жойидан кўрсатишмоқда. Масалан, кеча АҚШдаги энг катта телеканалларидан бири Fox News Аризона штатида ўз автомобида полициядан қочиб кетаётган одамни кўрсатаётган пайтда, у одам тўсатдан тўппончасини чиқариб, миллионлаб телетамошабинларнинг кўзи олдида ўзини отиб ўлдирган эди. Кўп ўтмасдан ўша телеканал бундай қонли воқеани жонли кўрсатиб, ўз тамошабинларининг кўнглини беҳузур қилгани учун узр тилади. Ғарбда шундай қилиш одати қабул қилинган.Ўзбекистон ахборот воситаларида ҳам шу каби амалиётлар ҳаётга жорий қилинмоқда. Кечаги хабарларимизнинг бирида билдирилганидек, Olam.uz сайти жонажон президентимизни мункиллаб қолган чолга айланиб бўлганини яшириб, уни турли турли трюклар билан қирчиллама йигитдек қилиб кўрсатиш анъаналарини бузди. Ислом Каримнинг атрофда нима бўлаётганини ҳам тушунмаётган ва мункиллаб қолган чолга айланиб бўлганини кўрсатадиган расмини эълон қилиб, шарманда қилди.
Бизнинг танқидимиздан кейин бу сайтдан Ислом Каримнинг ўша расми дарҳол олиб ташланди. Аммо, ҳали ўқувчилардан узр тиланмади.
Расмни яхшилаб кўриш учун уни курсор билан босинг ва Olam.uz сайтидан узр талаб қилаётганлар сафига қўшилинг.
