24 March 2012
12:00 -
16 афғонни ўлдирган америкалик сержант бутун умр озодликдан ёки умридан маҳрум этилиши мумкин
АҚШ Қуролли кучларининг расмийларига асосланиб тарқатилган хабрларга кўра, сержант Роберт Бэйлсга шу йил 11 март куни Афғонистонда 17 кишини қасддан ўлдириш ва яна 6 кишини ўлдиришга ҳаракат қилиш айби қўйилган. Бундай жиноят учун энг камида умрбод қамоқ жазоси берилади, у кейинчалик авф этилиши ҳам мумкин. Энг оғир жазо, табиий, ўлим жазоси бўлади.Роберт Бэйлс ўз адвокатларга оммавий қотиллик кунининг ҳамма воқеаларини эсласа ҳам, ўз ҳарбий базасидан чиқиб кетиб, қайтиб келишигача бўлган воқеаларни мутлақо эслай олмаслигини айтибди. Яъни у оммавий қотиллик пайтини эсламайди, холос.
Хабарларда айтилишича, 38 ёшли Роберт Бэйлс ўта омадсиз одам бўлган. У коллежни битиргандан кейин йилига 100 минг доллар маош оладиган ишгача кўтарилибди, аммо кейин турли қинғир ишлар билан қўлга тушибди, иш судгача бориб, унга нисбатан алданган одамларга 1 млн долларлик пул тўлаш ҳукми чиқарилибди. Кейин у инвестицион компания ташкил этибди, аммо банкрот бўлибди ва ҳокозолар.
У 2001 йилда АҚШда юз берган террористик ҳужумлардан кейин армияга кирган ва 3 муддат Ироқда хизмат қилган. Афғонистонда 4-чи муддат хизматини ўтаётган пайтда унинг хотини ва икки фарзанди яшайдиган Вашингтон штатидаги уйи қарзлар туфайли мажбуран сотишга чиқарилган.
Хуллас, Роберт Бэйлс руҳий стрессда бўлгани ва стресс остида шундай қотиллик қилгани иддао этилмоқда. Ниҳоий қарорни, табиий суд чиқаради.
