04 June 2011
02:00 - “Ҳаракат” хатқутисидан: “Пули йўқ одам”
Бунда ҳамма ненидир сотар,
Пул билан ўлчанар ҳар дам, ҳар қадам,
Зору ҳайронликда кунларинг ўтар,
Ҳолинг не кечмоқда пули йўқ одам?

Ҳамма олсам дейди, дейди бермасам,
Сени тушунмайди мард ҳам номард ҳам.
Чайқовчига тегар қўлни сермасам –
Ҳолинг не кечмоқда пули йўқ одам?

Болалар пул дейди, пул дейди хотин,
Мулла ҳам пул дейди, пул дейди отин.
Пулдан яратганми бу инсон зотин -
Ҳолинг не кечмоқда пули йўқ одам?

Бошингда сочингдан танишларинг кўп,
Барининг қўлида ота мерос чўп.
Дунёнинг нелигин англадингми, хўп –
Ҳолинг не кечмоқда пули йўқ одам?

Одамлар бойлик деб юрт кезар сарсон,
Гоҳо, бир кечада бўлурлар яксон.
Сенда қаноат кўп, сенга кўп осон –
Ҳолинг не кечмоқда пули йўқ одам?

Ўзинг оч бўлсанг-да, элга нафинг кўп,
Бировдан қарзинг йўқ, катта гапинг кўп.
Ҳеч ёлғиз эмассан қара, сафинг кўп-
Ҳолинг не кечмоқда пули йўқ одам?

Сенсиз ўтмас сира тўй ҳам, мотам ҳам,
Асли, сендан чиққан машҳур Ҳотам ҳам.
Худди сендек эди шўрлик отам ҳам-
Ҳолинг не кечмоқда пули йўқ одам?
Хўжа Насридинда бойлик бўлганми?
Ё, Алдар тоғамда ойлик бўлганми?
Машраб бобонг уйлик, жойлик бўлганми -
Ҳолинг не кечмоқда пули йўқ одам?

Ёшликдан чапани, ёв урар эдинг,
Фил берсам тушликка қовурар эдинг.
Бой бўлсанг барибир совурар эдинг-
Ҳолинг не кечмоқда пули йўқ одам?

Гапни опқочмадим оз-моз ўрадим,
Сендай қўли очиқ сахий кўрмадим.
Яратгандан сенга соғлиқ сўрадим -
Бошинг тошдан бўлсин пули йўқ одам!

Ҳамроқул Асқар
« Олдинги хабар
Хабарлар рўйхати
Кейинги хабар »

Ким кимдир? Who is Who?Добавить персону