02 June 2011
06:28 -
Wall Street кеча мудҳиш кун яшади, Dow Jones ўпирилди
Кеча Нью-Йоркдаги Wall Street фонд бозорининг асосий индекси Dow Jones сўнгги кунлардаги секин-аста тушишни давом эттириш билан чекланмади, у ўпирилди деса ҳам бўладиган даражада тушди. Эрталаб Wall Street очилганда, Dow Jones индексининг қиймати 12569,79 бўлган бўлса, кечқурун ёпилганда 12290,14 бўлди. Яъни, у 279,42 нуқатага ёки 2,22 фоизга тушди.Wall Street экспертлари бу ҳолни май ойи натижаларига кўра, АҚШ иқтисодининг тузалиш тезлиги камайгани билан тушунтиришга ҳаракат қилмоқдалар. Янги иш жойлари яратиш ҳам кутилганидан оз бўлибди.
АҚШнинг энг кучли банкларидан бири Bank of America акцияларининг нархи 4,26 фоизга тушибди - аввал $11,24 эди, энди $10,74 бўлди.
Ўзбекистонда ҳам иш олиб бораётган General Motors корпорацияси акциясининг нархи $30,23 дан $28,65 га тушибди.
“Ҳаракат” мухбирининг фикрича, Dow Jones индексининг тушиши вақтинчалик. Бунинг асосий сабаби, 2 кун аввал АҚШ Конгрессининг республикачилар назорати остидаги қуйи палатаси – Вакиллар Уйи – президент Барак Обаманинг АҚШ бюджетидаги дефицит миқдорини яна 2 триллион долларга орттириш таклифини рад этганидир. Демак, назарий жиҳатдан келаси йил бюджетини тасдиқлаш хавф остида қолди. Аммо, бу хавф тезда орқада қолади, тарафлар келишиб олишади.
