22 April 2010
09:10 - Виктор Янукович Украинани Россияга табиий газ эвазига сотди
Кеча Россия ва Украина президентлари Харьковда учрашдилар. Ўтган ҳафтанинг охирида бундай учрашувнинг режалаштирилгани эълон қилинганда, кун тартибида чегарадош ҳудудларда ҳамкорлик ва табиий газ нархи хусусида музокаралар борлиги айтилган эди.

Аммо, учрашувдан кейин эълон қилинган натижалар ҳаммани шокка туширди. Россия Украинага сотадиган табиий газ нархини тушириш эвазига, ўз ҳарбий-денгиз флотининг Севастополдаги базасини яна 25 йил сақлаб қоладиган бўлибди. Аввалги шартноманинг муддати 2017 йилда битади. Аввалги президент Виктор Юшчеко ва жорийдаги парламентда бир вақтлар кучли коалицияга эга бўлган зарғалдоқчилар 2017 йилдан кейин Россия флоти Севастоподан кетиши кераклигини гапиришарди.

Аммо, зарғалдоқчиларнинг ичидаги жанжаллар ва манфаатлар қарама-қаршилиги туфайли, уларнинг коалицияси тугади, президент сайловида зарғалдоқчиларнинг асосий душмани, руспараст Регионлар Партиясининг лидери Виктор Янукович ғалаба қозонди. Мана энди бу партия секин-аста зарғалдоқ инқилобининг натижаларини йўқ қилиб, Украинани яна Россиянинг қучоғига ташламоқда.

Тўғри, газнинг нархи туширилишидан Украина 2019 йилгача 40 миллиард доллар фойда кўради. Минг кубометр газнинг ўртача нархи 303 доллардан тахминан 200 га тушади. Севастоподаги база учун Россия 2017 йилгача ҳар йили 98 миллион пул ҳам тўлайди. Аммо, бунинг эвазига Украина ўз қучоғида Роосиянинг бутун минтақага хавф солувчи флотини сақлайди, Украинанинг мустақиллиги таҳлика остида қолади.

Зарғалдоқчиларнинг қолган-қутганларини бирлаштирувчи мухолифат дарҳол президент Виктор Януковичга импичмент эълон қилиш учун ҳаракат бошлашини билдирди.

Агар икки мамлактнинг парламентлари бу шартномани ратификация қилса, Украинанинг Европага интеграцияси, ЕИ ва НАТОга аъзолик масалалари узоқ йилларга кун тартибидан тушишининг, Қирғизистондаги воқеаларни ҳам ҳисобга олиб, Россия собииқ империя ҳудудларида ўз таъсир кучини қайта тиклаш йўлида жиддий ишга киришганининг гувоҳи бўлишимиз мумкин.
« Олдинги хабар
Хабарлар рўйхати
Кейинги хабар »

Ким кимдир? Who is Who?Добавить персону