Маҳаллий вақт билан бугун эрталаб соат 6:21 да, Тошкент вақти билан 15:21, Флорида штатидаги космодромдан Discovery шаттл кемаси фазога учирилди. Шаттл кемаларининг охирги авлод намунаси бўлган Discovery, балки, сўнгги марта фазога кетди.

Маълумки, бу йил мавжуд шаттларнинг учиши тўхтатилади ва америкаликларнинг ҳозир тайёрланаётган янги авлод кемалари битгунча, америкаликлар ҳам русларнинг алмисоқдан қолган “Союз” кемаларидан фойдаланиб туришади. Бу кемалар Халқаро Фазовий Станциянинг ишлаб туриши ва у билан алоқа қилиб туриш учун жуда муҳимдир.

Бугун учирилган Discovery кемасида етти нафар астронавт, русларнинг терминологияси бўйича, космонавт бор. Кема Халқаро Фазовий Станицияга бориб туташади ва 13 кунлик сафардан кейин орқага қайтади.

Алан Поиндекстер (Alan Poindexter) командирлигидаги экипажнингт ҳаммаси америкаликлар. Уларнинг 3 нафари фазога биринчи марта учишмоқда. Reuters агентлигининг хабарига кўра, бугун учирилган Discovery Халқаро Фазовий Станиция ишга тушгандан бери унга жўнатилган кемаларнинг 131-чиси экан. Ҳақиқатдан, фазовий шаттл кемалар бўзчининг мокисидек оддий нарсага айланди. Дарвоқе, инглизча shuttle сўзи айнан “моки” деганидир.