14 December 2009
11:54 -
Туркияда турк-курд қарама-қаршилиги кучайди
Курдларнинг Демократик Жамият Партияси 11 декабрда Конституцион Суд тарафидан бекитилгач, бир томондан, бу қарорни олқишловчилар, бошқа томондан, унга қарши бўлганларнинг намойишлари бўлишини кутиш керак эди. Туркия ахборот воситаларининг хабарларига қараганда, шундай бўлмоқда ҳам.Кеча Анқарада Миллиётчи Ҳаракат Партияси тарфидан уюштирилган митингга об-ҳавонинг ёмонлигига қарамасдан 50 минг одам тўпланди, Конституцион Суднинг қарори олқишланди. Партия лидери Давлет Боғчали (расмда) бош вазир Эрдўғонни мамлакатни бўлишга олиб кетаётганликда, курдларнинг террорига қарши етарлича кураш олиб бормаётганликда айблади.
Туркиянинг кўпроқ курдлар яшайдиган шарқий қисмининг энг катта шаҳри Диёрбақирда курдларнинг энг катта норозилик намойишлари бўлди, гранаталар отилди, баъзи дўкон ва машиналар ёқилди. Полиция кўз ёшартирувчи газ ва сув ишлатиб намойишчиларни тарқатди.
Истанбулнинг энг бой дўконлари жойлашган Бейўғли номли қисмида турклар ва курдлар уришишгача бордилар. 200 кишилик курдлар гуруҳи дўконлар ва машиналарни ёқишга бошлагач, миллатчи турк ёшлари қўлларига тушган нарса билан қуролланиб безориларга ҳужум қилдилар. Полиция уларни ажратишга муваффақ бўлди.
Ҳеч бир ерда ўлган ёки жиддий ярадор бўлганлар ҳақида хабар йўқ.
