22 October 2009
20:52 -
ЕИ Ўзбекистонга қурол сотиш тақиқини йўқ қилмоқчи, демократик мухолифат бу қадамнинг натижаларидан фойдаланиши керак
Маълумки, Андижонда Ўзбекистон ҳукумати тинч аҳолини ўққа тутиб, юзлаб одамларнинг ўлимига сабаб бўлгач, ЕИ Ўзбекистонга қарши кўпроқ рамзий аҳамиятга эга бўлган санкциялар киритганди. Ҳеч таъсир кучи бўлмаган бу санкицияларни бекор қилиш баҳонасида Ўзбекистон билан алоқаларни тиклаш ва Ўзбекистонни Ғарб дунёсига интеграция қилиш воситасида уни демократиялаштириш ғояси биринчи бўлиб “Бирлик” Партиясининг Андижон воқеаларининг бир йиллигига бағишланган баёнотларида ўртага отилганди. Кейинчалик, Абдураҳим Пўлат билан Пўлатжон Охун тарафидан ЕИнинг Ташқи ишлар ва хавфсизлик масалалари бўйича бош комиссари Халвер Соланага йўлланган мактубда бу таклиф конкретлаштирилди.ЕИ “Бирлик”нинг таклифларини қабул қилди ва Ўзбекистон билан алоқаларини нормаллаштиришга бошлади, мамлакатимизда сиёсий муҳит ҳеч шак-шубҳасиз юмшади. Бир қатор сиёсий маҳбуслар озод қилинди. Бу шароитдан фойдаланиб, Ўзбекистонда демократик жараёнларни тезлаштириш - демократик мухолифатнинг вазифасидир.
2007 йилда санкцияларнинг асосий қисми йўқ қилинган бўлса ҳам, Ўзбекистонга қарши киритилган қурол сотиш тақиқи ҳали ҳам бор, унинг муддати шу йил 27 ноябрда битиши керак.
ЕИ ичидаги жараёнларни ёритишга мўлжалланган euobserver.com сайтининг хабар беришича, 20 октябрь куни Брюсселда тўпланган ЕИ дипломатлари Ўзбекистонга қарши киритилган қурол эмбаргосини ҳам бекор қилиш таклифини ишлаб чиқишган. ЕИда қабул қилинган процедурал қоидаларга кўра, бу таклиф келаётган душанба куни Люксембурда бўладиган Ташқи ишлар вазирларининг йиғилишида муҳокамасиз тасдиқланади.
Шу нарса ҳам маълумки, таклифни ишлаб чиқишда Германиянинг бу масала бўйича позицияси асосий роль ўйнаган. Унинг вакиллари аввалданоқ эмбаргонинг давом эттирилишига қарши эканликларини билдиришганди. Германиянинг позицияси ташқи кўринишидангина “Бирлик”нинг позициясига ўхшайди. Моҳиятан ундай эмас. Минг афсуски, немислар Ўзбекистонда демократик жараёнларнинг ривожланишини эмас, Термездаги ҳарбий базалари ва немис компанияларининг Ўзбекистон билан ҳамкорлигининг тақдирини ўйламоқдалар, холос.
Аммо яна қайтариб айтиш керакки, дейди мухбиримиз,Ўзбекистон билан Ғарб алоқаларининг ривожланиши мамлакатимизга демократия шамолларини олиб келади. Ундан фойдаланиб, демократик жараёнларнинг ривожланишини жадаллаштириш -мухолифатнинг вазифасидир. Ҳозир мухолифатнинг фаолият ичидаги ягона ташкилоти бўлмиш “Бирлик” Партиясигина буларни тушунмоқда ва шу йўналишда иш олиб бормоқда.
“Ҳаракат” маъмуриятидан: Бу уч қизалоқнинг расми euobserver.com сайтидаги мақоладан олинди.
