21 October 2009
11:00 - Бугун "Бирлик" халқ ҳаракати “Ўзбек тили – давлат тили” шиорини амалга оширилишига эришган кун
1989 йил 21 октябрь ўзбек халқининг тарихида абадий қоладиган кунлардан бири. Айнан шу куни “Бирлик” халқ ҳаракати кўтарган “Ўзбек тили – давлат тили” шиори амалга ошди, Ўзбекистон Олий Совети “Бирлик”нинг талаби, қолаверса, унинг халқ иродасини ўзида акс эттирувчи босими остида ўзбек тилини давлат тили деб эълон қилувчи қонун қабул қилишга мажбур бўлди.

21 октябрь фақатгина тилимизга давлат тили мақоми берилиши билан муҳим эмас. Бу кун – миллатнинг озодлиги, мамлакатнинг мустақиллиги учун кураш йўлидаги муҳим босқичнинг ғалаба билан тугалланган кунидир.

Ўзбекистоннинг ўша даврдаги раҳбарлари, хусусан, ҳозирги президент Ислом Карим бу ғалабанининг йўлини тўсиш учун ҳар нарсани қилиб кўрдилар. Салой Мадамин раҳабрлигидаги бир гуруҳ ёзувчиларни, улар ҳозир 53-54-чилар номи билан танилган, тўғридан-тўғри сотиб олиб, “Ўзбек тили – давлат тили” шиори остида “Бирлик” ўтказаётган митингларни тўхтатишга интилдилар. 1989 йил 10 сентябрга белгиланган 100 минг кишилик митингни тўхтатишга эришдилар ҳам. Ваҳоланки, 10 сентябрь фақат Ўзбекистонда эмас, умуман СССРда, биринчи рангли инқилоб бўладиган кун эди.

Шундай зарбага қарамасдан, “Бирлик” митингларини давом этирди. 24 ва 31 сентябрь, 15 октябрь куни ўтказилган митинглар ўзбек халқининг тарихида абадий қоладиган воқеалардир. У воқеалар кинорежиссёр Абдулазиз Маҳмуд тарфидан тасмаларга туширилган, улар асосида фильмлар қилинган. Минг афсуски, ҳали ўзбек халқи у фильмларни кўргани йўқ. Аммо, кўради ва ўша кунларга ўз баҳосини беради.

Ҳозирги режимнинг маддоҳлари гўёки Ислом Каримнинг раҳнамолигида ўзбек тили давлат тили бўлганини гапиришни яхши кўришади. Ҳақиқат бошқача. Айнан, ўзбек тилини ҳам яхши билмайдиган Ислом Карим тилимизга давлат тили мақоми берилишига тиш-тирноғи билан қарши бўлган. Ўша кунги воқеалар буни очиқча кўрсатиб турибди.

Агар у буни истаса, “Ўзбек тили – давлат тили” шиори остида ўтказилиши режалаштирилаётган минтингни тўхтатганларнинг раҳбари, гўёки антикоммунист Салой Мадаминни Коммунистик партия рўйхатидан депутат қилиб, митингларни давом эттиришга эришган Абдураҳим Пўлатни 16 октябрь куни, яъни ўзбек тилига давлат тили мақоми бериш арафасида, ўша митингларнинг ташкилотчиси сифатида Коммунистик партиядан ўчиртирармиди?

“Ўзбек тили – давлат тили” шиори остидаги митингларда қатнашган отахонларни калтаклатиб, ҳатто ўзбек тилига давлат тили мақоми берилаётган куни бир гуруҳ митинг қатнашчиларини, уларнинг ичда ҳамма биладиган журналист-бирликчи Анвар Усмон ҳам бор эди, 10 кунлик қамоқда ушлаб турармиди?

Ҳа, бугун ўзбек халқининг эзгу ниятларини амалга ошириш учун курашган “Бирлик” халқ ҳаракатининг ғалаба куни. Ислом Карим ва унинг 53-54-чи гумашталарининг мағлубият куни.

Ўзбек халқи бу кун ва у билан боғлиқ воқеаларни ахир бир кун ўрганади ва уларни ҳач қачон унутмайди.
« Олдинги хабар
Хабарлар рўйхати
Кейинги хабар »

Ким кимдир? Who is Who?Добавить персону