15 October 2009
00:17 - Тошкентда Александр Файнберг оламдан ўтди
Бугун тунда узоқ давом этган ҳасталикдан сўнг шоир, эссенавис ва кинодраматург, Ўзбекистон Халқ шоири Александр Файнберг ўз квартирасида вафот этди. Шоирни дафн этиш маросими пайшанба куни пойтахтнинг Боткин қабристонида ўтади.

2-ноябр куни Ўзбекистоннинг таниқли русийзабон шоири, ажойиб инсон Александр Аркадьевич Файнберг 70 ёшга тўлиши керак эди. Шоир давлат мукофотлари берилишини кутмасдан вафот этди, - унга давлат мукофоти лауреати унвонини топшириш ҳақидаги ҳужжатлар ҳамон кўриб чиқиш учун олий ҳукумат амалдорларининг тахмонларида ётибди.

Ўз ўлимидан сал илгари Файнберг 1-ҳукумат касалхонасидан чиқарилган, у ерда жигар ва юрак ҳасталигидан деярли бир ой давомида даволанган эди. Аъзои баданини касал ўртаганига қарамай, Александр Аркадьевич умрининг сўнгги дақиқаларигача шоирона фикрлади. Гарчи, сўнгги йилларда унинг лирик сатрларида кўпроқ Мангулик мавзусига бағишланган маҳзун образлар ва фикрлар кўпроқ ўрин олган эди.

Унинг ёру дўстлари бу очиқ, оқил ва ўта ҳалол инсонни севиб, унга «Саша, Сашок» дея мурожаат қилишарди, - уларнинг даврасида соатлаб у ўз шеърларини ўқиши, ҳаёт силсиласи ҳақида фикрлаши мумкин эди. Битилган шеърий сатрлардаги ҳар қандай ноёб топилма уни ёш бола каби қувонтирар ва у шу заҳот у, қувончини баҳам кўриш учун яқинларига қўнғироқ қила бошларди (сўнгги йилларда у деярли уйидан чиққани йўқ).

«Яна бир Буюк санъат арбоби орамиздан кетди. Мен бугун бу бир қайсарона ўта ҳақгўй, самимий, ёрқин инсон билан, ҳаёт икир чикирлари туфайли, кўпроқ муносабатда бўлиш имконини бой берганимдан афсусдаман. Шоир даҳосининг тенги йўқ, шак шубҳасиз бўлмайди ҳам, - дейди шоирнинг дўсти, таниқли журналист Феруза Хошимхонова.

- Ахир у яқиндагина менга бир неча бор қўнғироқ қилган, бор йўғи, баҳслашиш, гаплашиш ва ўз дилида кечаётган ижодий жараёнлар ҳақида фикримни билишни истаган эди…».

Александр Файнберг 16 шеърий тўплам муаллифидир. Яқинда унинг сўнгги китоби «Япроқ» (Лист) чоп этилди. Шоир шунингдек ўзининг сценарийлари билан ҳам машҳур, улар асосида 10 дан ортиқ ҳужжатли ва бадиий фильмлар суратга олинган. // Uznews.net
« Олдинги хабар
Хабарлар рўйхати
Кейинги хабар »

Ким кимдир? Who is Who?Добавить персону