06 August 2009
02:45 -
Туркияда 1,5 ойлик эгизаклардан бири иккинчисини қутқарди
Адана шаҳридаги кўп қаватлар уйларнинг бирида 2 қаватдаги квартирада ижарада турадиган Отакул оиласида антиқа воқеа юз берибди. Кун иссиқ бўлгани учун ота-она Ясемин ва Меҳмет Отакуллар 2 ёшли қизлари билан балконда ухлашар экан, 1,5 ойли эгизакларидан бири Рамазон йиғлабди. Уни эмизиш учун турган она эгизаклардан иккинчиси Мустафони олиб қочаётган ўғрини кўриб қолиб, бақиришга бошлабди. Ўғри қўлидаги Мустафони кўрпачалар устига отиб, ўзи қочишга бошлабди. Уйғонган эр ўғрини ушлаш учун қўлига тушган пичоқ билан уни оёғидан ярадор ҳам қилибди. Ўғри жон аччиғида балконга югуриб чиқиб, у ердан ўзини ташқарига отибди ва қаттиқ яраланиб ётиб қолибди.Буёғи траги-комедияга ўхшайди. Меҳметнинг ўзи тез ёрдам машинаси чақириб, ўғрини касалхонага олиб борибди, аммо у 2 соатдан кейин ўлибди. Полицияда ҳисобда турадиган профессионал ўғри экан ўлган йигит.
Табиий, ота-она бахтли. Эгизаклардан бири қорни очиб йиғламаса эди, иккинчи эгизакнинг тақдири нима бўлиши номаълум-ку. Айниқса, она севинчидан эгизакларини қучоқлаб йиғлар эмиш.
Маълум бўлишича, оила бошлиғи Меҳметнинг тайинли иши ҳам йўқ бўлгани учун, уйларида ўғирлайдиган пул ёки тузукроқ нарса бўлмаган. Шу сабабли, ўғри чақалоқларнинг бирини ўғрламоқчи бўлган деб тахмин қилинмоқда. Бу воқеа туфайли машҳур бўлиб кетган Меҳмет, балки, энди тузукроқ иш ҳам топар.
