13 February 2023
02:00 -
Юсуф Жума: ИЛОҲИЙ ЖУМБОҚЛАР, ИЛОҲИЙ СЎРОҚЛАР, ИЛОҲИЙ ҚЎШОҚЛАР, ИЛОҲИЙ ҚЎШИҚЛАР
Сен Тангрининг ёғдусими,Ё Тангри сенинг ёғдунгми?!
Сен Тангрининг кўчкусими,
Ё Тангри сенинг кўчкунгми?!
Сени Тангрида кўрдимми,
Тангрини сенда кўрдимми,
Сен Тангрининг кўзгусими,
Ё Тангри сенинг кўзгунгми?!
Тангри сенда турадими,
Сен Тангрида турасанми,
Сен Тангрининг турғусими,
Ё Тангри сенинг турғунгми?!
Тангрида пастлик бўлмайди,
Чўққилардан иборатдир,
Сен Тангрининг чўққисими,
Ё Тангри сенинг чўққингми?!
Орзудан ўзга бир ерда
Интилиш йўқ, Тангри тинмас,
Сен Тангрининг орзусими,
Ё Тангри сенинг орзунгми?!
Эрк - севгига тутқунликдир,
Тангри ўрни - эркинликдир,
Сен Тангрининг севгисими,
Ё Тангри сенинг севгингми?!
Ҳеч нарса бўлмас - Тангрисиз,
Тангри Тангрига ҳам Тангри!!!
Сен Тангрининг Тангрисими,
Ё Тангри сенинг Тангрингми?!
2023 йил,12 февраль.
Қадим - қадим замонлардан
Қадимги севгилим келди.
Ўлмасин деб армонлардан,
Қадимги севгилим келди.
Ёши ҳамон ўн олтида,
Кўрки юзининг ўтида,
Қоракўлдан - жон юртимдан
Қадимги севгилим келди.
Бир юзидан ой ютилди,
Бир юзидан кун тутилди,
Барча севги унитилди,
Қадимги севгилим келди.
Олган жонимни ҳам олиб,
Қолган жонимни ҳам олиб,
Кўркига Тангрини солиб,
Қадимги севгилим келди.
Кўнглим келди - кўнгли билан,
Тилим келди - тили билан,
Жоним келди - бели билан,
Қадимги севгилим келди.
Қолганди - ич - тешим келди,
Соямга жон қушим келди,
Оёғида бошим келди,
Қадимги севгилим келди.
Хуш кўрдим, хуш келибсан, хуш,
Эсиз, ўнггим эмасдир, туш.
Қадимги севги - ўлмас эш,
Қадимги севгилим келди.
2022 йил, 13 декабрь.
Ёғду селлари ёғади,
Ойдиннинг ойдинларидан.
Ой тўғади, кун тўғади,
Ойдиннинг ойдинларидан.
Кўзи - ойдин, юзи - ойдин,
Ёғдулари - Тангрига ин,
Айрилдим - мен, айрилдим - мен,
Ойдиннинг ойдинларидан.
Кўк тушиб кундуз олади,
Бесаноқ юлдуз олади,
Пишиқчилик - ёз олади,
Ойдиннинг ойдинларидан.
Кечим ойдин - ойдин эди,
Ичим ойдин - ойдин эди,
Очун ойдин - ойдин эди,
Ойдиннинг ойдинларидан.
Тушимда ёниб чопаман,
Сўқмоқларини ўпаман,
Тангрини излаб топаман -
Ойдиннинг ойдинларидан.
2023 йил, 10 февраль.
