31 July 2009
20:24 -
АҚШда катта тўпалонга айлантирилган мини-воқеа пиво-саммити билан тугади

Воқеа жуда оддий. Хитойдан командировкадан келган шу Университетнинг қора танли профессори Генри Гейтс уйининг калитини тополмагани сабабли, ўз шахсий уйининг эшигини бутунлай ҳам эмас, қулф ўрнатилган жойидан уйига бузиб кирибди. Зийрак қўшнилардан бири, узоқдан профессорни танимагани учун бўлса керак, полиция чақирибди.
Профессор Генри Гейтс дарҳол воқеа жойига етиб келган полицияга вазиятни тушунтирса эди, ҳеч нарса бўлмасди. Аммо, у полиция сержанти оқ танли Жеймс Кроули билан гаплашишни ҳам истамабди, ўзи президент Обама билан таниш эканлигини назарда тутиб бўлса керак, “Сен ким билан гаплашаётганингни биласанми?” деб қўполлик қилибди.
Хулас, гап-гапга уланиб, ўзбекчасига айтсак, икки тараф ҳам “аравани қуруқ обқочиб”, оддий тушунмовчиликни кичик жанжалга айлантиришган. Гапларнинг орасида профессор полиция сержантига “Мен қора танли бўлганим учун, шундай қилмоқдасан” деворибди ҳам. Сержант ҳам бўш келмасдан Генри Гейтсни жамоатчилик тартибини бузишда айблаб, қўлига кишан солиб, полицияга олиб кетган.
Бу воқеанинг оммавий ахборот воситаларига тушиши аслида арзимаган воқеага ёғ сепишдек бўлди. Журналистларнинг бу ҳақдаги саволига жавоб берган президент Обама полиция ходимининг ишини “ўта аҳмоқлик” деб баҳолади ва масаланинг ирқий томони борлигига ҳам имо қилди. Тўғриси, ёғ устига яна ёғ сепди. Универститет жойлашган шаҳарча полиция ходимлари, ўз ҳамкасбларининг ҳақли бўлганини таъкидлаб, президентдан кечирим сўрашни талаб қилишди.
Ана шундан кейин Оқ Уйдагилар жанжални бостириш лозимлигини тушундилар, шекилли, воқеага етралича чиройли шаклда нуқта қўйилди.
Президент Обама қора танли профессор ва оқ танли полиция сержанти билан телфон орқали гаплашди, бу тушунмовчиликни ривожлантирмасдан тўхтатишга чақирди ва сержантнинг таклифи билан икки тарафни ОҚ Уйга пивоо ичишга таклиф қилди.
Кеча кечқурун Оқ Уйнинг ҳовлисида шу тарихий “пиво учрашуви” бўлиб ўтди. Пиво-саммити деб ном берилган бу учрашув норасмий эканлиги таъкидланди. Президент Обама ва уларга қўшилган вице-президент Байден, расмда кўриниб турганидек, кастюм ва галстуксиз, енглари шимарилган ҳолда ўтиришибди. Уларнинг олдига фақат бир минутга журналистлар ҳам қўйилган. Уларнинг айтишича, “жанжалчилар” ўзларини анча ноқулай сезишаётгани кўриниб турибди.
Табиий, пиво-саммити рамзий бир тадбир эди, томонлар пивони бир хўплашдан нарига ўтишмаган.
Қани энди, дунёнинг ҳамма катта-кичик жанжаллари шундай битса.