Яккабоғ туман ҳокимининг собиқ ўринбосари Мансур Туймаев ва унинг устига бензин сепиб ёқиб юборган тадбиркор Баҳриддин Исамов устидан очиқ суд жараёни якунига етди.
18 октябрь куни жиноят ишлари бўйича Чироқчи туман судида судланувчилар Яккабоғ туман ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари вазифасида ишлаган Мансур Туймаев ва тадбиркор Баҳриддин Исамовга нисбатан жиноят ишини кўриб чиқиш бўйича суд жараёни ниҳоясига етди ва суд ҳукми эълон қилинди. Бу ҳақда Ўзбекистон Олий суди расмий вакили Азиз Обидов «Газета.uz»га хабар қилди.
Мазкур жиноят иши жиноят ишлари бўйича Чироқчи туман суди раиси Лутфулла Мамаражабов раислигида кўриб чиқилди.
Эълон қилинган суд ҳукмига кўра, Баҳриддин Исамов Ўзбекистон Жиноят кодексининг 25,98-моддаси (кучли руҳий ҳаяжонланиш ҳолатида қасддан одам ўлдиришга суиқасд қилиш) да тутилган жиноятни содир этганликда айбдор деб топилиб, унга шу модда билан 2 йил озодликни чеклаш жазоси тайинланди. Эҳтиёт чораси сифатида 2019 йил 21 июлдан 2019 йил 29 августга қадар 1 ой 8 кун қамоқда ўтирган кунлари тайинланган жазодан Жиноят Кодексининг 62-моддаси (дастлабки қамоқ вақтини ҳисобга олиш қоидалари) га асосан чегирилиб, қатъий ўташ учун 1 йил 10 ой 22 кун озодликни чеклаш жазоси қолдирилди.
Мансур Туймаев эса Жиноят кодексининг 192−1-моддаси (хусусий мулк ҳуқуқини бузиш) 3-қисми «а» банди ва 206-моддаси (ҳокимият ёки мансаб ваколати доирасидан четга чиқиш) 2-қисми «а» бандида назарда тутилган жиноятларни содир этганликда айбдор деб топилди.
Унга 1 йил мансабдорлик ва моддий жавобгарлик вазифаларида ишлаш ҳуқуқидан маҳрум қилган ҳолда энг кам ойлик иш ҳақининг 510 баравари миқдорида яъни, 103 392 300 сўм жарима жазоси тайинланди. Жаримани давлат фойдасига ундириш белгиланди. М. Туймаевнинг жиноий ҳаракатлари оқибатида 61 та тадбиркор ва 30 та фуқарога етказилган моддий зарарни тўлиқ қоплаб бериш мажбурияти Яккабоғ туман ҳокимлиги зиммасига юклатилди.
Мазкур жиноий иш бўйича судга раислик қилувчи томонидан судланувчиларга ва бошқа томонларга ҳукм устидан шикоят қилиш тартиби ва муддати тушунтирилди. // Gazeta.uz
“Ҳаракат”: Бу мудҳиш воқеага 2019 йил 23 июлдаги хабаримизда изоҳ берар экан, Қашқадарёнинг Яккабоғ тумани - биз тарафимиздан “Ўзбекнинг Робин Гуди” деб аталган “Бирлик” Халқ Ҳаракати фаоли, айни замонда, “Бирлик”нинг ўша тумандаги ташкилоти лидери Шовруқ Рўзимуроднинг юрти эканлигини, бу улуғ инсонни 2001 йил июль ойида Ўзбекистон Ички Ишлар Вазирлигининг Тошкентдаги қарогоҳига олиб келиб, бир кеча ертўлади ушлаб турганлари ва эртаси куни у ўз-ўзини осиб қўйганини эълон қилганлари эслатган эдик. Кўриб турибмизки, Яккабоғда ҳали ҳам ўзбекнинг Робин Гудлари бор экан, улар халқнинг манфаатлари учун курашни давом эттираётган эканлар.
Мана ўша воқеа бўйича кеча суд ҳукми ҳам эълон қилинди. Бу ҳукм қанчалик адолатли эканлигини вақт кўрсатади.
