20 March 2009
04:00 -
18:30 - Қирғизистон парламенти навбатдаги президент сайлови кунини белгилади
18:30 - Қирғизистон парламенти навбатдаги президент сайлови кунини белгилади
Бугун бу мамлакатнинг парламенти - Юқори Кенгаш навбатдаги президент сайловини шу йил 23 июлда ўтказишга қарор қилди.
Қирғизистоннинг 2003 йилда қабул қилинган Конституциясига кўра, президент 4 йилга сайланарди. Ҳозирги президент Қурмонбек Бақиев ҳокимиятни 2005 йил “лола инқилоби”дан кейин қўлга олиб, ўша йили президент этиб сайланган ва лавозимига 25 октябрда ўтирган эди. Конституцияга бундан кейин киритилган ўзгартиришлар президентлик муддатини 5 йилга чиқарди. Шу билан ҳуқуқий нуқтаи назардан ноаниқлик пайдо бўлди: Бақиев 4 йилми ёки 5 йил президент бўлиши керак?
Бундан бир неча кун президентга содиқ бўлган депутатлардан Асилбек Женбеков Конституцион Судга мурожаат қилиб, мавжуд бўлган ноаниқликка муносабат билдиришни сўради. Кеча Конституцион Суд жорийдаги президентнинг муддати 4 йил эканлиги, шу сабабли, янги сайлов 25 октябргача бўлиши кераклигини билдирди.
Мана бугун парламент Конституцион Суднинг қарорига асосланиб навбатдаги президент сайловинининг кунини ҳам белгилади.
Қирғизистонда, Ўзбекисондан фарқли ўлароқ, ҳамма нарса қонунлар доирасида қилинаётгани мақтовга сазовордир. Лекин, масаланинг яна бир тарафига эътибор бериш лозим.
Ҳозир президент Бақиев ўз сиёсатида демократиядан кўра кўпроқ авторитар прнципларга орқа қилмоқда. Унинг партияси парламентда ҳукмрон. Шундай экан, у истаса, президентлик муддатим 2010 йилда битади деб эълон қилса ҳам бўларди. Унинг шошишининг сабаби бошқа. Ҳозир унинг халқ ичида обрўси баланд. Бир йилдан кейин нима бўлишини эса, ҳозир ҳеч ким аниқ билолмайди. Айниқса, дунёдаги иқтисодий бўҳроннинг Қирғизистонга қандай таъсир қилиши аниқ бўлмагани туфайли. Демак, сайловларни ҳозир ўтказиш ҳар томонлама Бақиевнинг фойдасига ишлайди.
Шу сабабли, Бақиевнинг ўзи содиқ депутати орқали Конституцион Судга мурожаат қилиб, кутилган қарорни чиқартирди, ундан кейин, қўлбола парламент унинг истагини қарорга боғлади.
