13 January 2009
04:00 -
23:30 - Абдураҳим Пўлат: Ўзбекларни сиёсий ҳомийликка ўргатиш ҳам демократларнинг вазифаларидан биридир
23:00 - Шўрчи тумани ҳокими жавобгарликка тортилди
23:00 - Шўрчи тумани ҳокими жавобгарликка тортилди
23:30 - Абдураҳим Пўлат: Ўзбекларни сиёсий ҳомийликка ўргатиш ҳам демократларнинг вазифаларидан биридир
Ҳа, ҳақиқатда, бу - муҳим вазифалардан биридир. Чунки, халқдан ёрдам олган ташкилотларгина (биз учун ҳозирги босқичда муҳим бўлгани - сиёсий партиялар) халққа, мамлакатга хизмат қиладилар. Акс ҳолда, кимдан ёрдам олсалар – унга хизмат қиладилар. Ўз взнослари ҳисобига яшашга ўрганган ташкилот ва партиялар - ўзлари учун яшайдилар.
Бу соҳада замонавий демократияларда яратилган усулардан бири – сиёсий партиялар фаолиятини миллатнинг ёрдамига боғлаш, шу йўл билан уларни назорат остига олиш ва ҳатто билвосита бошқаришдир. Миллатнинг ёрдами билан яшайдиган ташкилот ва партиялар ўз мустақилликларини йўқотадилар. Улар мамлакатнинг, миллатнинг ташкилотига айланадилар.Айнан шу сабабдан, диктатураларда сиёсий ҳомийлик/спонсорлик системаси яратишни ўйлаш мантиқсизликдир.
Ўз ташкилоти ва партияси ичида ўз ҳокимлигини сақлаб қолиш ниятидаги лидерлар учун ҳам ҳомийлик системасининг, ҳомийлик анъаналарининг яратилиши ўлим билан баробардир. Шунинг учун бундай лидерлар ёки лидерликка даво қиладиганлар ҳомийликка қарши бўладилар ёки ҳомийлари йўқлиги билан мақтанадиган даражада ибтидоий бўладилар.
“Бирлик” - демократик партиядир. Биз ватанга, миллатга хизмат қилиш учун сиёсий саҳнага чиққанмиз. Ватанга, миллатга хизмат қилиш – Ватандан, миллатдан мустақил бўлиш эмас, том тескариси, унга боғлиқ бўлиш, унинг амрида бўлишдир. Айни замонда, ўз фаолларимизнинг ва турли ташкилотларнинг (фондлар, ширкатлар ва б.) ҳомийлигидан ҳам воз кечмаймиз.
Шулар сабабли, ўзбеклар ичида ҳомийлик тушунчасини тарғиб қилиш, ҳомийлик анъаналарини яратиш йўлидаги ҳаракатларимиз давом этмоқда ва давом этаверади.
Биз бу ишни нолдан бошладик. Шуни ҳисобга олиб қарасак, натижаларимиз ёмон эмас. Аввалги хабарларимизда бизга берилган ёрдам ҳақида маълумот бериб келдик. Ҳозир бошқа янгиликлар ҳам бор.
Швецияда очилан банк ҳисобимизга биттаси Даниядан, иккинчиси Швециянинг ўзидан ҳар бири 100 долларлик пул ўтказмалари келди.
Ҳомийликни, қанчалик қийин бўлмасин, Ўзбекистон ичида ҳам бошлаш муҳим. Бошладик ҳам. Бошлаганлар - ўз фаолларимиз. Шу кунларда “Бирлик” ва “Эзгулик”нинг Андижон вилоятдаги етакчиси Саиджаҳон Зайнобиддин ва “Бирлик” Партияси раисининг Фарғона водийси бўйича ўринбосари Ҳамдам Сулаймон 150 доллардан ёрдам беришга қарор қилганларини билдирдилар. Улардан тушган маблағ бунга муҳтож бўлган маҳаллий демократларга ёрдам сифатида ишлатилади.
Демократия учун курашни қўллаб ҳомийлик қилган ҳамма хайрихоҳларимиз ва сафдошларимизга чуқур миннатдорчилик билдираман.
Бу олийжаноб ва керакли фаолиятга қўшилишни истаганлар учун қуйидаги маълумотларни эслатаман.
1. АКШ ва Канадада яшаётганлар ўз ёрдамларини «Uzbekistan Associates – Harakat» номига ёзилган чек ёки «Money order» воситасида ташкилотнинг қуйидаги адресига юборишлари мумкин:
Uzbekistan Associates – Harakat
7318 Fountain Spring Ct
Springfield, VA 22150
2. Европада яшаётганлар ўз ёрдамларини Швециянинг Swedbank банкида «Association Central Asia» ташкилоти номига очилган қуйидаги ҳисоб рақамига ўтказоладилар:
Association Central Asia
IBAN = SE18 8000 0821 4999 4259 1562
SWIFT/BIC = SWEDSESS
Швециянинг ўзида яшаб, Швед кронида пул ўтказиш истаганлар учун банк ҳисоби:
Association Central Asia
Clearingnummer 8214-9
Kontonummer 994 259 156 2
Яна бир бор ҳаммага ҳурмат ва ташаккурларимни изҳор этаман.
23:00 - Шўрчи тумани ҳокими жавобгарликка тортилди
Сурхондарё вилояти Шўрчи тумани ҳокими Ўрол Бобоқулов йирик миқдордаги талон-тарожлик ва мансаб суистеъмоллигида айбланиб, жиноий жавобгарликка тортилди. У лавозимидин четлатилиб, терговларга жалб қилинди. Унинг ўрнига вилоятнинг Бойсун туманида ҳоким бўлиб ишлаётган Эркин Бойниёзов туман ҳокими этиб тайинланди.
Шоир Ғулом Мирзонинг оиласида фожеа
Ўзбекистон Президенти девонининг етакчи консультанти, шоир Ғулом Мирзонинг қизи фожеали ҳалок бўлди. Ўтган йилнинг 21 декабрида ғойиб бўлган қизнинг жасади пойтахтдаги хусусий хонадонларнинг биридаги музлатгичда 18 бўлакка бўлинган ҳолда 20 кундан сўнг топилди. Тошкент шаҳар ИИББ жиноят қидирув бўлими тезкор вакилларининг ҳаракатлари натижасида марҳуманинг курсдоши, Ўзбекистон Жаҳон тиллари университети халқаро журналистка факультети 4-курс талабаси Н. ҳибсга олинди ва ваҳшийларча қилган ҳаракатини бўйнига олди.
Маълум бўлишича, журналистликка даъвогар ўспирин ўз танишини шафқатсизларча ўлдирган, жиноятини яшириш мақсадида миршабларга ёлғон маълумотлар бериб келган. Қорақалпоқ миллатига мансуб бу талабанинг отаси Қорақалпоғистон Республикаси Ўқитувчилар малакаини ошириш институти ректори экан. Ҳозирда тергов ҳаракатлари бормоқда. Парламентнинг собиқ депутати - шоир Ғуломнинг дўстлари хонадонги ҳамдардлигини билдиришмоқда.
Бундай воқеа ҳаммани даҳшатга солиши табиий. Биз ҳам шоирга ҳамдардлигимизни билдирамиз.
22:30 - Режимбоши ҳарбийларга табрик йўллади
Ўзбекистон Президенти Ислом Карим касб байрами муносабати билан ҳарбийларга табрик йўллади. Узундан узоқ табрикда мамлакатимизнинг узоқ шонли ўтмишидан тортиб, ёрқин келажаги йўлидаги ҳарбийларнинг бурч-маъсулиятлари ҳақида гапирилган. Уни Миллий театр биносидаги байрам анжуманида ўқиб эшиттирган Президентнинг Давлат Маслаҳатчиси Хайриддин Султоннинг ўзи ҳам ғайри-табиий ҳаяжонда эди. У “юртбоши”нинг ҳарбий соҳадаги (?) оламшумул ислоҳотлари ҳақида гапириши ҳам кулгили бўлди.
Журналист Кушодбек Усмонов ҳибсга олинди
Кеча мустақил журналист ва ёзувчи Кушодбек Усмонов Андижон вилояти Асака тумани ИИБ томонидан ҳибсга олинди. 64 ёшли журналистга нисбатан ўтган йилнинг октябрида Ўзбекистон Республикаси ЖКнинг 277-моддаси (Безорилик) билан жиноят иши қўзғатилганди. Янги йил байрами арафасида Ўзбекистон инсон ҳуқуқлари “Эзгулик” жамиятига мурожаат қилган Кушодбек Усмонов ўзига нисбатан провакация уюштирилаётгани, қамоққа олишлари мумкинлигидан хавотир билдириб арз қилганди.
Маълум бўлишича, Кушодбек Усмонов Асака тумани ИИБ участка нозири Ҳ. Қосимов, туман ИИБ бошлиғи А. Бердибоев, виляоят ИИБ полковниклари К. Ҳикматов ҳамда А. Ҳашимовларнинг жиноятларини фош этиб келган. Миршаблар эса Кушодбек Усмоновнинг жияни М. Тожибоев орқали провакация уюштиришган, бу ўспириндан ўз амакиси урганлиги ҳақида шикоят ёздириб олишган. Ва, уни мана қамоққа олишди.
Кушодбек Усмонов қатор маҳаллий нашрларда ишлаб, нафақага чиққан, китоблари чоп этилган ёзувчидир. Унинг рафиқасининг таъкидлашича, ўтган йили айнан шу миршаблар унинг уйига кўкнори ташлаб, ҳибсга олишган ва тергов даврида айблари тасдиқланмагач, озодликка чиқарилган. Журналистнинг 7 нафар фарзанди бор, у вақтинчалик Тошкент шаҳрида истиқомат қилаётган эди.
22:00 - Барак Обама Афғанистонга эътиборни орттириш ниятида қатъий
Вашингтон Пост газетасида бугун ёзилишича, АҚШнинг сайланган-президенти Барак Обаманинг инаугурациядан кейин имзолайдиган биринчи қарори Гуантанамо қамоқхонасини бекитиш бўлади. Обама имзолаши аниқ бўлган қарорлардан яна бири – Пентагоннинг таклифи билан АҚШнинг Афғонистондаги қўшинлари сонини ҳозирги 32 мингдан 62 мингга чиқариш, яъни қўшинлар сонини 30 мингга ошириш бўлади. Афғанистонда 30 минг атрофида НАТОга кирувчи бошқа мамлакатларнинг қўшинлари борлигини ҳисобга олинса, анитеррор коалициясининг бу мамлакатдаги қўшинлари 100 минг кишига яқинлашади.
Обама сайловолди кампанияси давомида Афғанистонни “террорга қарши марказий жабҳа” деб эълон қилганди. Кўринишидан, бу масалада Обама сайлолди ваъдасини тўла бажармоқчи.
Американинг бундай қадами Марказий Осиё ва хусусан Ўзбекистон учун ҳаётий масалага айланади. АҚШ Давлат Котиби лавозимига Ўзбекистонни яхши билган, биринчи леди сифатида Ўзбекистонни зиёрат қилган Хилари Клинтоннинг келиши ҳам муҳимдир.
“Бирлик” раиси Абдураҳим Пўлат АҚШ қўшинлари Афғонистонга янги кирган даврда “Свобода” радиосига берган интервьюсида “Энди АҚШ Марказий Осиёда абадий қолади” деган эди. Унинг бу башорати ҳам тўғри чиқмоқда. Айниқса, ҳозир рус матбуоти АҚШнинг Афғонистонда собиқ СССР каби мағлубиятга учраши ва Толибоннинг қайтадан ҳокимиятга келишини башорат қилар экан - “Бирлик”нинг позицияси қанчалик реалистик эканлиги яна бир марта исботини топмоқда.
21:00 - Ўзбекистонда йўқ демократиянинг элементлари Эронда бор, у ерда ҳақиқийга яқин сайлов бор
Бу йил июнь ойида Эронда президент сайлови бўлади. Дунё матбуотида тарқатилган хабарларга қараганда, ҳозирги президент Маҳмуд Аҳмадинажод янги муддатга президент бўлиш ниятида. Мамлакатнинг диний лидери аятолло Сайид Али Ҳоменеий уни қўлламоқчи.
Ўзбекистондан фарқли ўлароқ, Эронда мухолифатчиликка йўл берилган. Мухолифат ҳам сайловда ўз номзоди билан қатнашмоқчи. Номзодликка номзодлар рўйхатида собиқ президент (уни ҳатто реформатор дейишади) Муҳаммад Ҳотамий ва собиқ Бош вазир Мирҳусайин Мусавийлар бор.
Албатта, Эрондаги сайловларни ҳам ҳақиқий демократик деб бўлмайди. Чунки, диний лидер аятолло Сайид Али Ҳоменеийнинг рухсатини олмаган номзод сайловга киролмайди, танқид ҳам чегараланган.
Ҳатто Эрон каби теократик мамлакатда демократия элементлари, яхшигина ривожланган сайлов системаси борлиги, Ўзбекистон эса ҳали ҳам коммунистларнинг анъаналарига асосланган ибтидоий сайлов системаси билан яшаши, ўзбек жамияти ривожлантирилмаётгани - Ислом Каримнинг давлат ва миллатга қарши қилаётган энг катта жиноятининг натижасидир.
