16 May 2012
06:22 -
Москвадаги “Чистые пруды” бульварида ўтказилаётган муддатсиз норозилик акциясини суд қарори билан тўхтатишмоқчи
Маълумки, президентликка қайтадан сайланган Владимир Путиннинг инаугурациясидан бери унинг мухолифатчилари турли шаклда норозилик акциялари ўтказмоқдалар. Шу кунларда бундай норозилик Москва марказидаги “Чистые пруды” бульваридаги Абай ҳайкали атрофида давом этмоқда. Бу ерда 100 дан ортиқ киши чодирсиз лагерь яратиб, шу ерда яшамоқда.Кеча Басманний туман суди шу атрофда яшайдиган одамларнинг ҳукумат тарафидан уюштирилган аризасини кўриб чиқиб, шаҳарда тартиб ва атрофдагиларнинг оромини бузувчи бу лагерни эртага пешингача ёпиш ҳақида қарор чиқарди.
Лагерда яшовчилар эса, овоз бериш йўли билан, полиция биринчи одамни ушлаб кетмагунча тарқамасликка қарор қилдилар.
Вазиятдан чиқишнинг бошқача йўллари ҳам кўрилди. Масалан, полициянинг махсус кучлари (ОМОН) бу ерга келмасдан олдин лагерни тарк этиш, ёки бошқа майдонга кўчиб ўтиш, ёки белкурак каби жиҳозларни қўлга олиб, бу бульварни ободонлаштираётган одамлар сифатида шу ерда қолавериш.
Путиннинг режими жаҳон жамоатчилиги, биринчи навбатда, Ғарбнинг норозилигини қўзғатмаслик учун, намойишларни “маданийроқ” йўллар билан йўқ қилиш ҳаракатида. Шундай йўллардан бири сифатида жамоат тартибини бузган одамларга солинадиган жарима миқдорини минг марта ошириш таклиф қилинмоқда. Бундай таклиф қонун лойиҳаси сифатида Давлат Думасига киритилди ва Думанинг тегишли комитети томонидан тасдиқланди ҳам. Қонун ҳам қабул қилинса керак, аммо энди норозилик намойишларини осонликча тўхтатиб бўлмайди.
Балки, кеча Владимир Путин билан учрашган Ўзбекистон Президенти Ислом Карим бундайларни ўйлаб ўтирмасдан ўққа тутишни таклиф қилгандир.
Кўрамиз, воқелар қандай давом этади.
