05 June 2011
04:25 -
Туркияда мухолифат лидери шок терапияси усулида гапириб, Эрдўғонниннг тишларини суғуриб олишга ваъда берди, у ҳам Абдураҳим Пўлатдан ўргандими?
Бугун Истанбулда буюк Отатурк тузган Жумҳурият Халқ Партиясининг 1 миллион кишилик тарафдорлари митингида нутқ сўзлаган партия лидери Кемал Қиличдорўғли бундан бир неча соат илгари ўзига қарши гапирган ҳокимиятдаги исломий илдизли Адолат ва Тараққиёт Партиясининг раиси, Туркия бош вазири Ражаб Эрдўғонга шундай жавоб берди: “Сен Анқарада нутқ сўзлаб, бизни Исроил тарафдори дединг. Биз Исроилни қўллаб-қувватлаётган эмишмиз. Америкага бориб яҳудийларнинг мукофатларини олиб юрган одам эдинг, энди арслон бўлиб қолдингми? Сафдошларим қўрқманг, мен унинг тишларини ҳаммасини суғириб оламан”.Туркияда сайловолди кампанияси даврида бир миллионлик митинг қилиш - анчадан бери бўлмаган воқеадир. Айнан шундан руҳланган Кемал Қиличдорўғли шок терапияси усулида гапирган бўлса керак, деган “Бирлик” Партияси лидери Абдураҳим Пўлат сўзларини қуйидагича давом эттиради:
Ҳойнаҳой Кемал Қиличдорўғли ҳам мендан дарс олиб, шок терапия усулида гапиришга бошлади. Ва тўғри қилди, буюк Отатуркнинг ишини давом эттираётган киши айнан шундай бўлиши керак, биздан ҳам ўрганиши керак. Чунки, нафақат Ўзбекистонда, балки, бутун Турк дунёсида ғояларининг кучи бўйича “Бирлик”нинг яқинига келоладиган партия йўқ ва бўлолмайди. Чунки, бизнинг ғоялар шунчалар тўғри ва узоқни кўзлаб шакллантирилганки, бошқа ғояларга асосланган жиддий партия тузилиши мумкин ҳам эмас.
Айнан шу сабабдан мен лидерликка даъво қилаётган ва арзимаган нарсаларни баҳона қилиб, юрт ташқарисига қочиб олган турли псевдо-демократларнинг тишини суғуриб олишдек майда иш билан шуғулланаётганим ҳам йўқ, балки, уларни сиёсат майдонидан йўқ қилиб келмоқдаман. Турли сайтларда яшашни сиёсий майдон демасак, албатта. Табиий, уларнинг ҳаммаси бирлашса-да менга қарши ҳеч нарса қилолмасликларини ҳам яхши биламан.
