07 June 2010
22:44 - Европада сиёсий учрашувлар ўтказган ўзбек демократлари ватанга қайтишди
“Эрк” партияси раиси Самад Муродов, “Бирлик” Партияси раиси ўринбосарлари Пўлат Охунов, Дайнов Ташанов, Ҳамдам Сулаймонов, шу партиянинг Сирдарё вилояти ташкилоти раиси Исроил Ризаев ва партия фаоли Анвар Каримовдан иборат гуруҳ аввал Швеция парламенти ва ҳукумати вакиллари билан, сўнгра Брюсселда Европа Иттифоқи расмийлари билан учрашувлар ўтказганини аввалги хабарларимизда тафсилотли шаклда билдиргандик. Маълумки, бу гуруҳдаги икки киши – Пўлат Охунов ва Анвар Каримов ҳозир мажбуран Швецияда яшайди. Қолганлар Ўзбекистон ичида фаолият олиб бораётган демократик мухолифат намояндаларидир. Кеча улар Стокгольмдан Рига орқали Тошкентга учишда ва бир неча соат аввал мамлакатга қайтиб келишди.

“Бирлик” Партияси раиси Абдураҳим Пўлат ва ўзбек демократларининг Европага ташрифини уюштирган Пўлат Охунов Тошкентга телефон қилиб, саёҳатдан қайтганларнинг баъзи бирлари билан гаплашдилар ва улар ҳеч қандай муаммосиз уйларига келганларини ўргандилар.

Бу гуруҳ аъзолари Европага учиш учун Тошкентда тўпланган кунларидан бери улар билан сал кам ҳар куни соатлаб телефон орқали гаплашиб турган Абдураҳим Пўлат ўзбек демократларининг Швеция ва Брюсселдаги учрашувларини шундай баҳолади:

- Самад Муродов, Дайнов Ташанов, Ҳамдам Сулаймонов, Исроил Ризаевларнинг Европага келиши ва Пўлат Охунов ҳамда Анвар Каримовлар билан биргаликда ўтказган учрашувлари - тарихий воқеадир. У - “Бирлик”нинг тузилиши, ўзбек тилига давлат тили мақомига берилиши, собиқ СССРдаги ҳамма демократ кучлар билан биргаликда Совет империясининг йиқилишига эришилиши, Ўзбекистон режимининг бутун ҳаракатларига қарамасдан 2001-2003 йилларда демократик мухолифатнинг қайтадан оёққа туриши каби воқеалар қаторидан жой олиши шубҳасиздир.

- Ўзбек мухолифатининг юрт ичида ўта оғир шартлар остида фаолият олиб бораётган лидерлари чет элга келиб йиғи-сиғи қилмасдан ва Ўзбекистонни демократия сари олиб бориш ўзларининг вазифалари эканлигини очиқча айтган ҳолда, Ғарб давлатлари, биринчи навбатда ЕХҲТ ва ЕИ каби тузулмалар ўзбек демократларига қандай ёрдам бериши мумкинлигини муҳокама қилишгани ва бу йўналишда қилинадиган ишлар бўйича келишишгани ўзбек демократиясининг муҳим ғалабасидир, Европа ўзбек демократик мухолифатини тан олишининг кўрсатгичидир.

- Ўзбекистонда демократик мухолифат партияларининг ҳукумат тарафидан тан олиниши ва мухолифатнинг расмий сиёсий саҳнага чиқишигина мамлакатимзда ўзгаришларга йўл очади деган ғоянинг биринчи марта бунчалик юксак савияда тилга олингани - унча-мунча одам тушуниб етмайдиган даражада муҳим аҳамиятга эгадир.

- Чуқур инқироз ичидаги Ўзбекистон буюк ўзгаришлар остонасига келди. Унинг келажаги учун маъсулиятни бўйнига олишга тайёр сиёсий арбоблар борлиги ҳаммага намойиш қилинди. Пўлат Охун буюк сиёсий лойиҳаларни амалга ошира оладиган сиёсатчи эканлигини яна бир марта кўрсатди. Биринчи навбатда унга ва у билан сўнгги кунларда бирга бўлган ўзбек демократларига шахсан миннатдорчилик билдирдим.

“Бирлик” лидерининг бу илк хулосаларига қўшилган ҳолда шуни ҳам айтиш керакки, ўзбек демократларининг Марказий Осиё миқёсида тенги бўлмаган Европа саёҳатига қасддан кўз юмиб келган Озодлик ва ББС радиоларининг ўзбек хизматлари ҳеч қачон ўзларини оқлай олмайдиган даражада шарманда бўлдилар. Уларнинг Ўзбекистон МХХси назорати остида ишлашига ишонмайдиган ақли расо одам ҳам қолмади. Россия ФСБсининг лойиҳаси бўлган ва Марказий Осиёда мустақил хабарчилик воситаси бўлишга даъво қилаётган фарғона.ру сайти эса, ҳақиқий башарасини яна бир марта кўрсатди, холос.

Расмда (чапдан ўнгга): Пўлат Охунов, Дайнов Ташанов, Ҳамдам Сулаймонов, Исроил Ризаев ва Самад Муродов.
« Олдинги хабар
Хабарлар рўйхати
Кейинги хабар »

Ким кимдир? Who is Who?Добавить персону