12 September 2009
03:19 -
Молдова президенти Владимир Воронин истеъфо берди
Бу мамлакатда президент парламент тарафидан сайланади. 1994 йилдан бери Владимир Воронин (расмда) раислик қилган Молдова коммунистлар партияси 2001 йил февраль ойида ўтказилган сайловлар натижасига кўра парламентда кўпчилик жойни эгаллади ва ўша йили 4 апрелда бу партия раиси парламент томонидан президент этиб сайланди. У 2005 йилдан бери иккинчи муддат президентлик қиларди. Унинг ўзи ҳам партияси ҳам ташқи сиёсатда Россия билан яқинлашиш тарафдори.Аммо, бу йил апрелдаги парламент сайловларида коммунистлар мағлубиятга учради. 101 жойлик парламентда улар 48 мандатга эга бўлдилар. 53 мандат Руминия билан яқинлашиш, ҳатто у билан бирлашиш тарафдори бўлган демократлар коалициясининг қўлига ўтди.
Янги муддатга президент бўла олмаслигини тушунган Владимир Ворони 11 сентябрь куни, расмий хабарларда айтилганидек, “ваколатларини бўйнидан соқит қилди”. Қизиғи шундаки, унинг ўзи парламент мажлисига келмаган, унинг аризасини парламент раиси Михай Гимпу ўқиб берган ва президент вазифасини вақтинча бажариш унга топширилган. Энди аввалдан эълон қилиниб, парламентда янги президент сайланиши керак.
Мамлакат Конституциясига мувофиқ, президент камида 60 овоз билан сайланиши лозим. Демократларда эса бунча овоз йўқ.
Хуллас, Молдовада сиёсий кризис давом этмоқда.
