24 August 2009
01:24 -
Жаслиқ коменданти Қуролбой Бердиев Юсуф Жуманинг қизига: “Америка аввал ўзига ақл топсин!”
Ўзбекистон ИИВ Жазони ижро этиш бош бошқармаси тизимидаги Жаслиқ (64/71-муассаса) лагерида сақланаётган диссидент шоир Юсуф Жумага нисбатан яна қийноқлар қўлланилмоқда. Бу ҳақда мухбиримизга шоирнинг қизи Феруза отаси билан Жаслиқдаги қисқа учрашувдан сўнг маълум қилди. Унинг айтишича, шу йилнинг 18 августида бир ҳафталик кутишдан сўнг отаси билан учрашишга муваффақ бўлган. Аммо, қонунга кўрра уч кун бўлиши керак бўлган учрашув қамоқхона маъмурияти томонидан бир кундан кейин кесилган. Шоир ўзига нисбатан қийноқлар қўлланилаётгани, яқиндагина 15 кунлик жазо карцерига ташлангани ва у ерда жазонинг 8-нчи куни ҳушидан кетиб йиқилганини баён қилган.
Феруза мухбиримиз билан суҳбатда бундан бир неча кун аввал лагернинг отряд бошлиғи Жамшид Атоев шоирни калтаклагани, ҳеч бир сабабсиз уни ҳақоратлаб, ўта ноинсоний муносабатда бўлганини таъкидлади. Дадамнинг умумий аҳволи яхши эмас, жуда ҳам озиб кетган, дейди Феруза. Бундан ташқари лагер бошлиғи Қуролбой Бердиев: “Агар яна ёзсанг, умуман отангни кўрмайдиган қилиб қўяман. Ёзиб нима фойда топардинг, отангни ҳимоя қилаётган Америка аввал ўзига ақл топсин. Унинг тирик қолишини истасанг, ёзишни бас қил” дебди.
Атиги бир кунлик учрашув берилишининг ўзиёқ маҳбусга қай тарзда муносабатда бўлинаётганини кўрсатиб турибди. Учрашувда Юсуф Жума унинг учун курашаётганларга умид қилаётганини, Ўзбекистоннинг Вашингтондаги элчихонаси олдида сиёсий маҳбусларни озод қилиш талаби билан ўтказилган пикетга Абдураҳим Пўлат ва Жаҳонгир Муҳаммад ҳам келгани ўзининг руҳини кўтарганини билдирибди.
Буларнинг мақсади нима, тушунмайман, шу кетишда тирик чиқмасам керак, деган ҳурриятпарвар шоир, айни замонда, ташқаридаги сафдошларидан ўзининг озодлиги учун курашни давом эттираверишни сўраган. Унинг ҳозир АҚШда яшайдиган рафиқаси Гулнора Олтиева ҳам ўзбек демократлари кўмагида мамлакатнинг нуфузли кишилари ҳузурида бўлиб, улардан эрининг озод қилинишида ёрдам беришини сўрамоқда. Масалан, у яқинда Абдураҳим Пўлат билан бирликда АҚШ Давлат Котибининг собиқ ўринбосари, ҳозирда Халқаро Республикачилар Институтининг президенти Лорри Крейнер билан учрашди, дейди мухбиримиз. Табиий, учрашув чоғидаги суҳбатнинг асосий мавзуси - Юсуф Жуманинг озодлиги учун нималар қилиш масаласи бўлди.
