21 August 2009
00:17 - Арманистондаги шахмат турнирида Рустам Қосимжонов пешқадамлар сафида
Арманистоннинг Жермук шаҳрида дунёнинг тўққиз мамлакатидан келган ўн тўрт нафар халқаро гроссмейстер иштирокида ўтказилаётган шахмат бўйича ФИДЕ Гран-присининг бешинчи босқичида Рустам Қосимжонов тўққизинчи турда ғалаба қозонган ягона шахматчи бўлди.

Мазкур тур олдидан учинчи ўринда бораётган ҳамюртимиз болгариялик Иван Чепариновга қарши оқ доналарда ўйнади. Мағлубиятсиз одимини давом эттираётган Р.Қосимжонов партиянинг бошиданоқ ҳужум уюштирди. Болгариялик гроссмейстер рақибига жиддий қаршилик кўрсатишга уринган бўлса-да, ўттиз тўққизинчи юришдан сўнг вужудга келган мураккаб вазиятдан чиқиб кетолмади ва қирқ иккинчи юришда мағлубиятини тан олди, деб хабар беради ЎзА.

Мусобақа жадвалида Р.Қосимжоновни ярим очкога ортда қолдираётган украиналик Василий Иванчук тўққизинчи турда ўз ҳамюрти Павел Элянов билан дуранг ўйнаган бўлса, венгриялик Петер Леко ҳам америкалик Гата Камский билан очко бўлишишга рози бўлди. Натижада ҳамюртимиз олти очко билан пешқадамларга тенглашиб олди. Ҳозирча, дастлабки учта поғонада бораётган Р.Қосимжонов, В.Иванчук ва П.Леко энг яқин таъқибчилари – арманистонлик Левон Аронян, украиналик Сергей Карякин, Павел Элянов ва россиялик Евгений Алексеевдан бир очкога ўзиб кетган.

Р.Қосимжонов ўнинчи турда Гата Камскийга қарши қора доналарда ўйнайди. // region.uz
« Олдинги хабар
Хабарлар рўйхати
Кейинги хабар »

Ким кимдир? Who is Who?Добавить персону