07 March 2023
16:42 -
Юсуф Жума: ТАМУҒНИ ДОДИМДАН ҚУРИБ, ТАМУҒ БИЛАН ҚЎРҚИТАСАН…
Бу очунинг учмоқмиди,Тамуғ билан қўрқитасан?!
Толе менга иноқмиди,
Тамуғ билан қўрқитасан?!
Айрилиқда ўтар ҳар кун,
Чекаман ҳар дамда минг ун,
Ҳар оҳимга дўзах - ўтин,
Тамуғ билан қўрқитасан.
Йиғилса барча жаҳаннам -
Бўлмас соғинчидан бир дам,
Бағритош сенми ё санам,
Тамуғ билан қўрқитасан?!
Турмуш қайноқ дудоғими,
Умрим қаймоқ ёноғими,
Очун учмоқ оёғими,
Тамуғ билан қўрқитасан?!
Кечир,мендан ўтган бўлса,
Оғир - сендан ўтган бўлса -
Тақдир жондан ўтган бўлса,
Тамуғ билан қўрқитасан?!
Ҳа, ёт - ҳаётимдан қуриб -
Ўзимга ётимдан қуриб -
Тамуғни додимдан қуриб,
Тамуғ билан қўрқитасан?!
Мени ўзгадан узоқ эт,
Мени Ўзингда ўтроқ эт,
Менга ўзидан учмоқ эт,
Тамуғ билан қўрқитасан?!
Билдириш: Тамуғ - дўзах.
2023 йил, 5 март.
* * * * *
Барчадан қолганда ожиз,
Барча сенга сабоқ берар.
Ҳолсиз йўлбарс, барча - қутуз,
Барча сенга сабоқ берар.
Кучдан қолган, бургут - дарға,
Сени ўқитади - ғўра -
Тухум ичидаги қарға,
Барча сенга сабоқ берар.
Ўсалмисан, билар - кўрар,
Тилсиз эшак тилга кирар,
Жасоратдан лофлар урар,
Барча сенга сабоқ берар.
Ёвуз аждар бўлсанг - сен тоқ,
Ҳамма сенга осар қулоқ,
Йўқса, шўрлик, ҳолинг чатоқ,
Барча сенга сабоқ берар.
Ёвузликни билим дерлар,
Ёвузларни олим дерлар,
Ожизларни ош - ем дерлар,
Барча сенга сабоқ берар.
Эзгин этди нечун бундоқ,
Юсуф, қонга бўл деб чанқоқ,
Қонга қон деб келганда чоғ,
Барча сенга сабоқ берар.
2023 йил,7 март.
