30 June 2009
18:44 - Гондурасда ҳарбий тўнтаришдан кейин сокинлик йўқ
Лотин Америкасида ҳарбийлар томонидан давлат тўнтариши қилиш 30-40 йил илгари оддий ҳолат эди. Мексика билан Никарагуа ўртасида жойлашган кичкинагина Гондурас ҳам шундай мамлакатлардан бири. Аммо, сўнги 30 йилда Гондурасда осойишталик давом этарди, мамлакатни қонуний сайланган президентлар бошқариб келарди.

Ўтган куни Гондурас ҳарбийлари президент саройига ҳужум қилиб, ухлаб ётган президент Мануэл Селайни пижамасида қўшни Никарагуага чиқариб юборишган эди. Яъни, давлат тўнтариши нисбатан тинч ўтди. Аммо, кечадан бери Мануэл Селайнинг тарафдоралри норозилик митинглари ўтказа бошладилар. Бугун намойишчиларнинг полиция билан тўқнашувларида бир одам ўлгани Мексика телевидениесидаги хабардан маълум бўлди.

Америка Давлатлари Ташкилоти (АДТ) қонуний президент Мануэл Селайнинг тарафини олди. Бу ташкилот чоршанба куни Вашингтонда фавқулодда мажлис ўтказмоқчи, ундан кейин Мануэл Селай АДТ раиси Хосе Мигель Инсульс ҳамроҳлигида Гондурасга қайтиш ниятида.

БМТ ҳам қонуний президентнинг ҳокимияти тикланишини талаб қилмоқда. Мануэл Селай бу ташктлотнинг Нью-Йоркдаги қароргоҳига таклиф қилинди.

Нима бўлганда ҳам бир нарсани эътироф қилиш мумкинки, 21 асрда дунё ўзгарган. Ҳозир ҳарбийлар учун ҳатто Лотин Америкасида ҳам тўнтаришлар қилиб, ҳокимиятни ўзгартириш осон бўлмайди.

Бу орада Гондурас ҳарбийлари вақтинча президент тайинладилар ва янги президент сайлови бўлишини эълон қилдилар. Бу сафар уларнинг ўйин ўтмаса керак.
« Олдинги хабар
Хабарлар рўйхати
Кейинги хабар »

Ким кимдир? Who is Who?Добавить персону