29 June 2009
05:13 -
Эроннинг Ғарб билан алоқалари бузилмоқда, ҳукуматга қарши намойишлар давом этмоқда
Ҳамма диктарорликларда аҳвол бир хил. Нимадир ёмон бўлса, дарҳол сабаб ташқаридан қидирилади. Эронда президент сайлови натижаларидан норози бўлган одамлар майдонларга чиқишди, ҳукуматдагилар айбни ўзларидан эмас, норозиларни гўёки қўллаб-қувватлаётган ташқи кучлардан қидиришмоқда.Кечаги хабарларимиздан маълумки, Эрон ҳукумати сайлов натижаларини бекор қилиш талаби билан тўхтовсиз норозилик намойишлари ўтказаётган Мирҳусайин Мусави тарафдорларининг митингларини тайёрлашда иштирок этишда айблаб инглиз элчихонасининг 6 ходимини ҳибсга олди. Аммо намойишлар тўхтамади.
Associated Press мухбирларининг Техрондан хабар беришича, кеча ҳам намойишлар давом этган. Уч мингдан ортиқ киши “бизнинг овозимиз қаерда қолди?” шиорлари остида Гоба жомеси олдида митинг ўтказишган, яъни бир ақлсиз ўзбек мухолифатчиси айтганидек “кўча чангитишган”. Мухолифатнинг кучи кўп бўлган Теҳроннинг шимолий қисмида ўтказилган митингни тарқатиш учун полиция қўз ёшлантирувчи газлар ишлатган.
Эрон расмийларининг айтишича, 12 июндаги сайловдан бери давом этаётган намойишчилардан 21 киши ўлган, кўплаб одам ҳибсга олинган.
Юнонистоннинг Корфу оролида мажлис ўтказаётган Европа Иттифоқига кирувчи мамлакатларнинг ташқи ишлар вазирлари Эрон ҳукуматининг қилаётган ишларини қоралаб, қамалганларни дарҳол озод қилинишини талаб қилганлар.
