Тошкент вақти билан 22:00 да (Киевда – 20:00) Украина президентлик сайловлари тугалланди. Унда 50% дан кўп сайловчилар қатнашди. Демак, сайлов ўтказилган деб ҳисобланади. Бир неча дақиқа ўтмасдан биринчи экзит-пол (сўровнома) натижалари эълон қилинди. Уларга кўра, биринчи турдаёқ 55.9% олган Петр Порошенко сайлов ғолибидир. Юлия Тимошенко иккинчи ўринда - 12,9%.

Эслатиб ўтамиз, украиналик миллиардер, энг катта шоколад заводларининг эгаси Петр Порошенко ўз вақтида зарғалдоқчиларнинг инқилобини қўллаб-қувватлаган ва Виктор Юшченко президентлиги вақтида унинг командасида ишлаган. Кейинчалик, Юшченко-Тимошенко жанжали туфайли зарғалдоқчилар ҳукумати йиқиб, Виктор Янукович ҳокимиятга келгач, Петр Порошенко унинг ҳукуматида вазир ҳам бўлган.

Ҳозир у Украинанинг жанубий вилоятларига кенгроқ ваколатлар бериш, рус тилини расмий тил деб эълон қилиш каби таклифлари билан мамлакатнинг ҳамма қисмларни бирлаштириш учун курашмоқчи.

“Ҳаракат”нинг фикрича, агар, узул-кесил натижалар бўйича ҳам Петр Порошенконинг ғалабаси тасдиқланса, мавжуд оғир вазиятда энг яхши президент бўлоладиган номзод президентлик курсисига ўтирган бўларди.

Апрель ойида олинган расмда чапдан ўнгга – “Удар” партиясининг лидери, Петр Порошенконинг тарафдори Виталий Кличко, Петр Порошенко, АҚШ Давлат Котиби Жон Керри ва жорийдаги Бош вазир Арсений Яценюк.