Биринчи саволга жавобни аввал Украина мисолида қидирамиз, аммо бу жавоб ҳамма мамлакатларнинг жамиятлари учун ҳам тўғридир. Жавоб эса шундай – мухолифат лидерлари аҳмоқ.

Тўғри, масалага чуқурроқ қарасак, мухолифат лидерларига бундай баҳо бериш керакмасдек туйилади. Чунки, мухолифат лидерлари ҳам, минг афсуски, қўполроқ қилиб айтсак, жамиятдан кўпроқ ўз манфаатларини, яна қўполроқ айтсак, ўз ҳамёнларини ўйлайдиган бандалар, Оллоҳнинг бандалари. Шуни тан олсакгина, мухолифат лидерлари аҳмоқ эмасликларини, жамият манфаатлари нуқати назаридан аҳмоққа ўхшашларини, ўз манфаатлари нуқтаи назаридан жуда ақлли эканликларини кўрамиз.

Энди Украинага қайтсак. УНИАН агентлигининг бугун тарқатган хабарига кўра, Ижтимоий ва Маркетинг Тадқиқотлари Маркази сўровнома ўтказиб, “Украинанинг кайфияти” деб номланган ҳисобот тайёрлабди.

Бу ҳисоботга кўра, агар ҳозир бу мамлакатда президент сайловлари ўтказилса, шу кунларда сиёсий саҳна марказида турган сиёсатчилар оладиган овоз қуйидагича бўлар экан:

29,5% - Виктор Янукович, ҳозирги Президент,
28,7% - Виталий Кличко, “Удар” Партиясининг лидери, машҳур боксчи,
18,6% - Феълан собиқ Президент Виктор Юшченконинг одами Петр Порошенко,
9,2% - Арсений Яценюк, Юлия Тимошенко блокининг парламентдаги лидери,
4,7 % - Петр Симоненко, Компартия лидери
3,8% - Олег Тягнибок, “Свобода” Партиясининг лидери.

Энг қизиғи, агар иккинчи турга Виктор Янукович билан бирга Виталий Кличко чиқса, боксчига сайловчиларнинг 63,9 фоизи, ҳозиги президентга 36,1 фоизи овоз беради.

Агар, иккинчи турга Виктор Янукович билан бирга Петр Порошенко чиқса, Порошенко 62,3%, Янукович - 37,7% овоз олади.

Худди шунга ўхшаб, иккинчи турда Янукович Яценюкга 41,6%га 58,4% овоз билан ютқазар экан.

Табиий, дейди “Бирлик” Партияси лидери Абдураҳим Пўлат, бу каби сўровномалар, улар қанчалик демократик шароитда ўтказилмасин, жамиятнинг кайфиятини тўла акс эттиромайди. Чунки, жамият биз тушунгандан ҳам мураккаб нарса, аммо сўровномаларнинг натижалари жамият ичидаги тенденцияларни ўзида акс эттириши шубҳасиздир.

Айнан шу нуқтаи назардан келиб чиқиб, “Ҳаракат” Агентлиги Озорбайжон ва Украинада мухолифатнинг сайловлардаги мағлубиятларининг асосий сабаби - мухолифат лидерларнинг ўз манфаатларини жамият, миллат манфаатларидан юқори қўйиши ва сайловларга ягона умумий номзод билан киришни истамаганидир, деб айтиб келмоқда. Мана, Украинада ўтказилган тадқиқотларнинг натижалари бизнинг фикрмизни тўла тасдиқламоқда. Ҳозир нисбий кўпчилик Янукович тарафида, бунинг устига унинг қўлида катта маъмурий ресурс бор. Бу икки фактор ишга тушса, Янувович кабилар биринчи турдаёқ ютиб кетаверади.

Мақсадимиз, ўзимизни мақташгина эмас, нима қилиш керак саволига жавоб қидириш.

Жавоб эса шундайки, узоқ тарих кўрсатаётгандек, жуда камдан кам чиқадиган ҳақиқий фидокорларни ҳисобга олмасак, мухолифат лидерлари жамият ва миллат манфаатларини ўз манфаатларидан ҳеч қачон юқори қўймайдилар ва қўя олмайдилар. Бу аксиомани Ўзбекистон мухолифатининг, хусусан, “Бирлик”нинг тарихида ҳам кўрдик. Ҳа, кўрдик-ки, ўзининг бир чақалик фойдаси учун ҳеч ўйламасдан миллатни сотиб кетувчи ҳаромийлар хира пашшадек кўпайиб кетган. Бундайларни миллат ва жамият манфаатларини биринчи ўринга қўйишга мажбур қилиш керак. Буни ким қилади? Жамият!

Мана, ҳалқани айланиб, бошланғич нуқтамизга қайтдик. Жамиятни ривожлантириш учун ўз манфаатларини жамият манфаатларидан устун қўймайдиганлар чиқиши керак, бундайларни эса жамиятнинг ўзи тарбиялаши, етиштириши керак. Яъни, боши берк кўчадамизми?

Йўқ, шу халқа бўйлаб юз йиллаб айланаверсак, ҳар бир айланиш натижасида, жамият ўзидан чиққан лидерларни керакли рамкаларда ушлаб туриш механизмларини яратаверади ва ахир бир кун ҳозирги ривожланган жамиятлар, ривожланган давлатлар даражасига чиқамиз. Европа куйиб-ёниб, кўплар хатолар қилиб ва катта қурбонлар бериб, йиллар сайин тажрибаси ортиб бориб, ҳозирги даражага чиқди.

Аммо, унутмайликки, ақлли одам, бировларнинг тажрибасидан сабоқ чиқариб, уларнинг йўлини тезроқ, ўта тезроқ ўтади, ўтиши керак, ўтиши шарт.

“Бирлик” Партияси миллат сифатини ҳам йўқотиб бўлган ўзбекларни шу усул билан, яъни одамзот тарихининг тажрибаларидан келиб чиқиб ва улар ёрдамида тезроқ оёққа қўйиш учун ҳаракат қилмоқда. Бошқалар ўтган йўлни тезроқ ўтиш учун шок терапияси усуллари билан ҳаромий-хоинларни нафақат тарбиялаш, керак бўлса йўқ қилиш билан шуғулланмоқда. Шундай хоинларни ББС ва “Озодлик” радиоси эшиттиришларидагина яшайдиган қилиб қўйганлар – айнан бизлармиз. Фақат кўзи кўр одамгина буни кўрмаслиги мумкин. Ҳозир ББС ва “Озодлик” радиоси қаторига КГБ вориси бўлмиш Россия ФСБси тарафидан яратилган ва юритилаётган Фарғона.ру сайти ҳам қўшилганини гапиришмоқда. Бу қатордагилар ҳеч нарсага эришишга қодир эмаслигини сўнгги йиллардаги тажрибамиз ҳам кўрсатиб турибди.

Эй, ўзбеклар, эс-хушингизни тезроқ йиғиб олинг, “Бирлик” атрофида бирлашишдан бошқа йўлингиз йўқ. Акс ҳолда миллат сифатини тиклай олмаймиз, қозоқларга мардикор ва фоҳишалар тайёрлайдиган подага айланамиз, айланмоқдамиз ҳам.