06 July 2012
17:29 - Нурсултон Назарбой Остонада Ҳазрати Султон жомесини очди
“Қозоғистон – кўп миллатли мамлакат, мусулмонлар - турли миллатларнинг вакилларидир. Биз тоқатли халқмиз. Бутун дунё биладики, Қозоғистонда ҳамма динлар бемаолол фаолият олиб бормоқда. Бизда Жаҳон ва анъанавий динлар лидерларининг қурултойлари ўтказилмоқда. Шулар туфайли бугунги байрам – ҳамма қозоғистонликларнинг байрамидир”, дебди очилиш маросимида нутқ сўзлаган мамлакат Президенти Нурсултон Назарбой. Унга кўра, бу жомеда 10 минг киши ҳайит намози ўқий олади.

У ўз нутқида жоменинг номи Аҳмат Яссавий билан боғликлигини алоҳида урғулаган бўлса ҳам, аслида, бу ном Нурсултон Назарбойнинг ўз исми билан боғликлигига ҳеч ким шубҳа қилмайди. Жоме унинг туғилган куни очилаётгани ҳам тасодиф эмас.

Казинформ агентлигининг хабарида билдирилишича, уч қаватлик жоменинг биринчи қаватида никоҳ ўқиладиган зал, овқатхона, эркаклар ва аёллар учун таҳоратхоналар бор. Иккинчи қаватда 4 минг эркак, учинчи қаватда 1 минг аёл намоз қила олади.

Жоме минораларининг баландлиги 77 метр, унинг битта буюк, 8 та кичкинароқ гумбази бор. Бош гумбазнинг баландлиги 51 метр, диаметри 28,1 метр. Кичкина гумбазларнинг баландлиги 7,6 метр, диаметри 10,45 метр.
« Олдинги хабар
Хабарлар рўйхати
Кейинги хабар »

Ким кимдир? Who is Who?Добавить персону