21 January 2012
22:11 -
“Буюк” Ленин яна Москва майдонларида – коммунистлар митинг қилишди, Россияда вазият мураккаб
Бугун Москванинг қоқ марказида, Кремлнинг биқинидаги Манежная майдонида Россия Федерацияси Коммунистик Партияси сайловолди митинги ўтказди. Маълумки, бу партиянинг лидери Геннадий Зюганов 4 март куни бўладиган президент сайловидаги номзодлардан биридир.5 минг атрофида одам қатнашган митингга Жириновскийнинг Либерал-демократлар партияси ва Мироновнинг “Адолатли Россия” партияси аъзолари ҳам қатнашишди. Жириновский ва Миронов ҳам президентликка номзодлардир. Лекин уларнинг ўзи митингга келишмади.
Геннадий Зюганов ва коммунистларга ғоявий яқин бўлган “Сўл қанот” фронтининг лидери, айни замонда, Болотная майдони ва Сахаров проспектида “Адолатли сайловлар учун” шиори остида ўтказилган умуммухолифат митингларининг ташкилотчи-раҳбарларидан бири Сергей Удальцов бугунги митингда нутқ сўзлашди. Сергей Удальцов коммунистларни 3 февралга режалаштирилаётган “Адолатли сайловлар учун” митингида фаолроқ қатнашишга ва у митингнинг рангини зарғалдоқдан қизилга айлантиришга чақирди (?!).
Бугунги митинг қатнашчилари Марказий Сайлов Комиссиясининг раиси Владимир Чуровнинг истеъфосини, унинг ўрнига мухолифат вакили тайинланишини, 4 декабрда ўтказилган парламент сайловларидаги қонунбузарликларнинг тўла текширилишини талаб қилишди, Владимир Путин Бош вазирлик лавозимини вақтинча бўлса ҳам тўхтатмасдан президентликка номзодлик қилаётганини қоралашди.
Бу митинг ҳам кўрсатмоқдаки, Россиянинг сиёсий саҳнасида мураккаб жараёнлар кетмоқда. “Адолатли сайловлар учун” шиорли митингларнинг мақсади Владимир Путинни тахтдан қулатиш бўлса, бугун Манежная майдонида тўпланганлар Путинни йиқитиш истакларни очиқча айтишмаса ҳам, асл мақсадлари шу.
Либерал-демократик руҳдаги Яблоко партиясининг президентликка номзоди Григорий Явлинский сиёсий рейтинги жуда паст бўлишига қарамасдан, феълан Путиннинг фойдасига бўладиган қандайдир ўйинлар қилиш билан овора. Миллиардер-номзод Прохоров ҳам айнан шундай.
Бундай шароитда парламент ичидаги расмий ва кўчаларда қолган норасмий мухолифат бирлашиб, ёки айри-айри бўлиб, Путинни шу сайловдаёқ ҳокимиятдан кетқизоладими, демократик жараёнлар учун йўл очиладими, маълум эмас.
Лекин, ҳеч шубҳасиз, уни кетқазиш жараёни бошланди.
4 февралда ўтказилиши режалаштирилаётган навбатдаги “Адолатли сайловлар учун” митинги ташкилотчилари кеча Москва шаҳар ҳокимлигига ариза топшириб, 50 минг кишилик митинг кичик ҳалқа йўлидаги Калуга майдонида бошланиб, у ердан Манежная майдонига юриш қилиниши ва митинг шу майдонда тугатилишини билдиришди. Норасмий баёнотларга кўра, ҳокимлик бунга рухсат бермоқчи эмас. Митингчилар эса, рухсатсиз ҳам митинг қилишга ҳақлари борлигини айтишмоқда.
